Ziara ya Waziri Mahiga katika picha

KIKAO CHA KAZI CHA UJUMBE WA WAZIRI MAHIGA NA MHE. DKT. WILBROAD SLAA, BALOZI WA TANZANIA NCHINI NORWAY MWENYE MAKAZI YAKE NCHINI SWEDEN

Mhe. Dkt. Augustine Mahiga, Waziri wa Mambo ya Nje na Ushirikiano wa Afrika Mashariki, akipokea taarifa ya kazi kutoka kwa Balozi wa Tanzania nchini Norway mwenye makazi yake Stockholm Sweden, Mhe. Dkt. Wilbroad Slaa, katika Hoteli ya Grand Oslo iliyopo kwenye mji wa Oslo, Norway.  

Mhe. Dkt. Augustine Mahiga, Waziri wa Mambo ya Nje na Ushirikiano wa Afrika Mashariki, akiwa kwenye kikao cha kazi na ujumbe wake mara baada ya kuwasili Mjini Oslo, Norway kwa ziara ya kikazi ya siku mbili. Kwenye ziara hiyo Waziri Mahiga ameongozana na Katibu Mkuu wa Wizara Prof. Adolf Mkenda (kulia kwa Waziri), Kaimu Mkurugenzi wa Idara ya Ulaya na Marekani Bw. Jestus Nyamanga, Mtaalam kutoka Wizara ya Nishati Bw. Adamu Zuberi, pamoja na maafisa waandamizi wa Mambo ya Nje. 

KIKAO CHA KAZI CHA UJUMBE WA WAZIRI MAHIGA KWENYE KAMPUNI YA STATOIL (EQUINOR) NA WATENDAJI WA KAMPUNI HIYO YENYE MAKAO YAKE MAKUU MJINI OSLO, NORWAY.

Katibu Mkuu wa Wizara ya Mambo ya Nje na Ushirikiano wa Afrika Mashariki Prof. Adolf Mkenda akisalimiana na Makamu wa Rais Mtendaji wa STATOIL Bw. Lars Christian Bacher mara baada ya ujumbe wa Waziri Mahiga kuwasili kwenye makao makuu ya kampuni hiyo Oslo, Norway. Wengine kwenye picha ni Mhe. Dkt. Wilbroad Slaa, Balozi wa Tanzania nchini humo, na Bw. Adamu Zuberi, mtaalam wa Wizara ya Nishati.

Balozi wa Tanzania nchini Norway, Mhe. Dkt. Slaa akisalimiana na Watanzania wawili Nyarobi na Eunice, wanaofanya mafunzo ya vitendo kwenye kampuni hiyo, baada ya kumaliza mafunzo ya shahada ya uzamili kwenye Chuo Kikuu Norway. 

Balozi wa Norway nchini Tanzania Mhe. Hanne Marie Kaarstad akizungumza kwenye kikao hicho kilichofanyika kwenye ofisi za makao makuu ya kampuni hiyo. Pichani chini Mhe. Dkt. Augustine Mahiga akisisitiza jambo wakati wa kikao hicho. 

Mhe. Dkt. Augustine Mahiga, Waziri wa Mambo ya Nje akipokea zawadi kutoka kwa Bw. Lars Christian Bacher, Makamu wa Rais Mtendaji wa kampuni ya Statoil. Pichani chini, Mkurugenzi Bacher akimkabidhi zawadi Mhe. Dkt. Wilbroad Slaa, Balozi wa Tanzania nchini Norway baada ya kikao hicho kumalizika kwa mafanikio makubwa. 

Picha ya pamoja 

Waziri wa Mambo ya Nje, Balozi Dkt. Augustine Mahiga akiwa kwenye picha na Mtanzania Nyarobi aayefanya mafunzo ya vitendo kwenye kampuni ya Statoil akiwa na mmoja wa Wakurugenzi watendaji wa kampuni hiyo.

Waheshimiwa Balozi Dkt. Slaa na mwenzake Balozi Kaarstad wanaowakilisha nchi zao Tanzania na Norway wakiwa kwenye picha ya pamoja na wanafunzi wa kitanzania Eunice na Nyarobi walionufaika na ufadhili wa kampuni ya Statoil kwenye masomo ya shahada ya uzamili ambao wanaendelea kupata mafunzo ya vitendo.

KIKAO CHA KAZI CHA UJUMBE WA WAZIRI MAHIGA NA UONGOZI WA SHIRIKA LA MAENDELEO LA NORWAY, NORAD MJINI OSLO NORWAY

Ujumbe wa Mhe. Dkt. Augustine Mahiga, Waziri wa Mambo ya Nje na Ushirikiano wa Afrika Mashariki ukiwa kwenye kikao cha kazi na Ujumbe wa Mkurugenzi wa Norad Bw. Jon Lamoy. Norad ni Shirika la Maendeleo ya Norway linalofadhili miradi mbalimbali ya maendeleo inayofadhiliwa na Serikali ya Norway. Shirika hilo lipo chini ya Wizara ya Mambo ya Nje ya nchi hiyo. 

Kaimu Mkurugenzi wa Idara ya Ulaya na Marekani kwenye Wizara ya Mambo ya Nje Tanzania Bw. Jestus Nyamanga akiwa na ujumbe wa Mhe. Waziri Mahiga, wakati wa kikao cha kazi na Shirika la Maendeleo la Norad la Serikali ya Norway.

WAZIRI MAHIGA ZIARANI NCHINI NORWAY

Mhe. Dkt. Augustine Mahiga, Waziri wa Mambo ya Nje na Ushirikiano wa Afrika Mashariki, akipokea taarifa ya kazi kutoka kwa Balozi wa Tanzania nchini Norway mwenye makazi yake Stockholm Sweden, Mhe. Dkt. Wilbroad Slaa, katika Hoteli ya Grand Oslo iliyopo kwenye mji wa Oslo, Norway. 

TAARIFA KWA VYOMBO VYA HABARI

ZIARA YA WAZIRI MAHIGA NCHINI NORWAY

Serikali ya Jamhuri ya Muungano wa Tanzania imeihakikishia Serikali ya Norway kuwa inaendelea kuelekeza nguvu zake kwenye kuweka mikakati sahihi ya kuvutia uwekezaji kutoka nje ya nchi, ikiwemo nchi ya Norway, ili kuleta maendeleo kwa wananchi wa Tanzania.

Hayo yamesemwa na Mhe. Dkt. Augustine Mahiga, Waziri wa Mambo ya Nje na Ushirikiano wa Afrika Mashariki wa Tanzania alipokutana na Bw. Jon Lamoy, Mkurugenzi wa Shirika la Maendeleo la Norway lijulikanalo kwa kifupi kama NORAD mwanzoni mwa ziara yake ya kikazi ya siku tatu Mjini Oslo, makao makuu ya Norway.

Katika mazungumzo yao, Mkurugenzi Lamoy alimueleza Waziri Mahiga kuwa shirika hilo limekuwa na uhusiano wa karibu na wa kindugu kwa zaidi ya miongo mitano na nchi ya Tanzania. Yeye binafsi na washirika wengi wa Tanzania nchini humo wanasifu utendaji kazi wa Serikali ya Awamu ya Tano chini ya uongozi wa Rais Dkt. John Pombe Joseph Magufuli hususan kwenye mapambano dhidi ya rushwa. Rushwa inarudisha nyuma maendeleo kwa kuikosesha nchi mapato, hivyo jitihada za Tanzania za kupambana na rushwa, hususan kwenye ukusanyaji kodi, zitawawezesha wananchi wa Tanzania kunufaika na huduma za kijamii na hatimaye kupata maendeleo kwa haraka.

Hata hivyo mkurugenzi huyo alitoa angalizo kuwa nia nzuri ya Serikali ya Tanzania ya kuweka mifumo thabiti ya uwekezaji wenye faida  ukiwemo ule wa sekta ya madini, ni muhimu ikakamilika mapema ili kutoa fursa kwa wawekezaji wapya kuwekeza kwenye sekta hiyo kwa wakati.

Kwa upande wake, Mheshimiwa Mahiga alielezea kuwa suala hilo tayari linafanyiwa kazi ambapo pamoja na Serikali kuweka mazingira rafiki  kwa wawekezaji, uwekezaji huo ni lazima uwe na faida kwa Watanzania na kwa maendeleo ya nchi.

“Serikali ya Rais Magufuli imedhamiria kuipeleka Tanzania kwenye uchumi wa kati unaoongozwa na sekta ya viwanda. Katika kutekeleza hilo, Serikali imepitia na kurekebisha baadhi ya sheria na mikataba ambayo ilikua inanufaisha upande mmoja. Marekebisho yanayofanyika sasa yanalenga kwenye kuleta faida kwa pande zote mbili yaani win win situation”alisisitiza Dkt. Mahiga.

Kwenye mkutano huo ambao pia ulihudhuriwa na Prof. Adolf Mkenda, Katibu Mkuu wa Wizara ya Mambo ya Nje na Ushirikiano wa Afrika Mashariki na Balozi wa Tanzania nchini Norway, Dkt. Wilbroad Slaa mwenye makazi yake nchini Sweden kwa pamoja walielezea kuwa marekebisho hayo, yatakapokamilika, yatarutubisha mazingira ya uwekezaji Tanzania ikiwemo mikataba itakayoridhiwa na Bunge ambayo italeta manufaa kwa pande zote mbili kama zifanyavyo nchi nyingi duniani, ikiwemo Norway.

Awali kabla ya mkutano huo, Mheshimiwa Mahiga alikutana na kufanya mazungumzo na uongozi wa Kampuni ya STATOIL yenye makao yake makuu Mjini Oslo, ambayo kwa sasa nchini humo inajulikana kama Equinor. Kampuni ya STATOIL Tanzania ni mshirika mkubwa nchini Tanzania kwenye shughuli za utafutaji na upatikanaji wa gesi.

Makamu wa Rais Mtendaji wa kampuni ya Statoil Bw. Lars Christian Bacher alielezea shughuli za kampuni hiyo Tanzania ikiwemo kujenga uwezo wa ndani ya nchi kwa Watanzania kuijua na kuendesha sekta hiyo muhimu kwa ukuaji wa uchumi. Kwa sasa kampuni hiyo inatoa ufadhili wa masomo ya shahada ya uzamili kwa Watanzania kumi kila mwaka kwenye eneo la mafuta na gesi.

Bw. Bacher pia alieleza kuwa uwekezaji wa kampuni hiyo kwenye masuala ya gesi ni wa muda mrefu, na matunda yake yanachukua muda kuonekana. Lakini yakishatoka yataongeza mara mbili upatikanaji wa nishati ya umeme nchini Tanzania, ambapo itaongeza uzalishaji wa viwanda pamoja na faida nyingine nyingi za kiuchumi.

Ujumbe wa Waziri Mahiga ulisifu jitihada za kujenga uwezo kwa Watanzania na kuelezea kuwa hatua hiyo itasadia sana kwenye kutoa elimu kwa Watanzania ili wawe na matarajio sahihi ya matokeo ya shuguli za uwekezaji wa kampuni hiyo nchini Tanzania. Waziri Mahiga aliwasihi kuendelea kujenga uwezo wa kada ya kati ya wataalam wa gesi kwa kushirikiana pia na vyuo vya ndani ya nchi ili utaalamu huo uendelezwe nchi nzima.

Waziri Mahiga yupo nchini Norway kwa ziara ya kikazi kuanzia tarehe 18 hadi 20 Juni 2018, kufuatia mualiko wa mwenyeji wake Mhe. Ine Eriksen Soreide, Waziri wa Mambo ya Nje wa Norway. Ziara hiyo imekuja baada ya Tanzania na Norway kusaini makubaliano ya ushirikiano mwaka 2017.

Mbali na kufanya mazungumzo na mwenyeji wake, Mheshimiwa Mahiga na ujumbe wake wanatarajiwa kukutana na makampuni ya Norway yanayowekeza Tanzania pamoja na kuzungumza kwenye Jukwaa la Oslo kuhusu uthabiti wa amani kwenye Eneo la Maziwa Makuu na mchango wa nchi jirani.

Jukwaa la Oslo linakutanisha watu mashuhuri duniani wanaoshughulika na utatuzi wa migogoro duniani akiwemo Katibu Mkuu wa Umoja wa Mataifa. Mkutano huu hufanyika mara moja kila mwaka kujadili masuala ya utatuzi wa migogoro duniani.

Imetolewa na:

Kitengo cha Mawasiliano ya Serikali,

Wizara ya Mambo ya Nje na Ushirikiano wa Afrika Mashariki,

Dar es Salaam, 19 Juni, 2018

Waziri afanya mazungumzo na Mjumbe Maalum wa Katibu Mkuu wa Umoja wa Mataifa

 Waziri wa Mambo ya Nje na Ushirikiano wa Afrika Mashariki Mhe. Balozi Dkt. Augustine Mahiga akimkaribisha Mjumbe Maalum wa Katibu Mkuu wa Umoja wa Mataifa katika Maziwa Makuu Mhe. Said Djinnit alipomtembelea Wizarani terehe 13 Juni 2018, Dar es Salaam. Anayeshuhudia kushoto ni Mratibu Mkazi wa Mashirika ya Umoja wa Mataifa na Mwakilishi wa Shirika la Maendeleo la Umoja wa Mataifa, Bw. Alvaro Rodriguez.

Mjumbe huyo alifika Wizarani kwa lengo la kuzungumzia hali ya usalama na amani katika nchi za Maziwa Makuu.Aidha, mjumbe huyo alimuomba Mhe. Waziri kufikisha shukrani zake kwa Rais wa Jamhuri ya Muungano wa Tanzania Mhe. John Pombe Magufuli kwa mchango mkubwa wa Tanzania katika kusaidia kutunza amani ya nchi za Maziwa Makuu.

 Mhe. Waziri Mahiga akiwa katika mazungumzo na mgeni wake Mhe.Djinnit.

Mkutano ukiendelea, wanaoshuhudia ni Kaimu Mkurugenzi wa Idara ya Afrika Bw. Salvatory Mbilinyi(wa kwanza kulia kwa Waziri), Bw. Ally Ubwa Afisa Mambo ya Nje na Bw. Magabilo Murobi Katibu wa Waziri na kushoto ni Ujumbe wa Mhe. Djinnit alioongozana nao.

Naibu Katibu Mkuu afanya mazungumzo na Mabalozi wa Uturuki, Algeria, Kuwait na Palestina.

Naibu Katibu Mkuu Balozi Ramadhan M. Mwinyi( wa kwanza kushoto) akiwasikiliza Mabalozi wa Uturuki, Palestina, Algeria na Kuwait ( hawapo pichani) walipomtembelea Wizarani tarehe 12 Juni,2018,Dar es Salaam. Kulia kwake ni Mkurugenzi wa Idara ya Ushirikiano wa Kimataifa, Balozi Celestine Mushy, Kaimu Mkurugenzi wa Idara ya Mashariki ya Kati Bw. Suleiman Saleh na Mwisho ni Afisa Mambo ya Nje Bw. Fidelis Odiro wakifuatilia mazungumzo hayo. 

Pamoja na mambo mengine mazungumzo hayo yalijikita katika kujadili namna ya kuendelea kuboresha mahusiano yaliyopo kati ya Tanzania na nchi hizo. Pia walizungumzia kuhusu azimio la Baraza kuu la Umoja wa Mataifa kuhusu haki za watu wa Palestine.

Balozi wa Algeria Mhe. Saad Belabeb(wa kwanza kushoto), Balozi wa Kuwait nchini Mhe.Jasem Ibrahim Al Najem, Balozi wa Palestine nchini Mhe.Hazem Shabat na mwisho ni Balozi wa Uturuki nchini Mhe.Ali Davutaglu wakimsikiliza Balozi Mwinyi (hayuko pichani) katika mazungumzo hayo.

Wakiwa katika picha ya pamoja baada ya mazungumzo.

Balozi Chana pamoja na Balozi Mboweto wawasilisha Hati za Utambulisho.

Balozi wa Tanzania nchini Kenya Mhe. Pindi Chana akiwa katika picha ya pamoja na Rais wa Sudan ya Kusini Mhe. Salvar Kiir mara baada ya kuwasilisha Hati za utambulisho. Balozi Chana mwenye makaazi jijini Nairobi nchini Kenya pia anaiwakilisha Tanzania nchini Sudani Kusini.  

Balozi Mteule wa Tanzania nchini Nigeria Mhe. Muhidini Ally Mboweto, alikabidhi Hati za Utambulisho kwa Rais wa Shirikisho la Jamhuri ya Nigeria Mhe. Muhammadu Buhari. Hafla hiyo ilifanyika katika Ikulu ya nchi hiyo Jijini Abuja na kuhudhuriwa na Mkewa Mhe. Balozi Hajat Ashura Ally Mboweto, Maafisa wa Ubalozi na viongozi mbalimbali wa Serikali ya Nigeria.

Balozi Muhidin Ally Mboweto akisindikizwa na Mkuu wa Itifaki kuelekea eneo la gwaride.

Balozi wa Tanzania nchini Nigeria Mhe. Muhidin Ally Mboweto akipigiwa wimbo wa Taifa na tayari kwa ukaguzi wa gwaride.

Ukaguzi wa gwaride

Balozi Mboweto akisaini kitabu cha wageni alipowasili Ikulu ya Nigeria tayari kwa kukabidhi Hati za Utambulisho kwenye taifa hilo.

Rais wa Shirikisho la  Jamhuri ya Nigeria Mhe. Muhammadu Buhari akipokea Hati za Utambulisho kutoka kwa Balozi Muhidin Ally Mboweto kama Balozi wa Tanzania nchini Nigeria.

Mhe. Buhari akizungumza na Balozi Mboweto mara baada ya kuwasilisha Hati za Utambulisho. 

Katibu Mkuu wa Mambo ya Nje akutana na Mratibu Mkazi wa Mashirika ya UN nchini

Katibu Mkuu wa Wizara ya Mambo ya Nje na Ushirikiano wa Afrika Mashariki, Prof. Adolf Mkenda (kulia) akizungumza na  Mratibu Mkazi wa Mashirika ya Umoja wa Mataifa na Mwakilishi wa Shirika la Maendeleo la Umoja wa Mataifa, Bw. Alvaro Rodriguez alipofika Wizarani tarehe 11 Juni, 2018 kwa ajili ya kuzungumzia masuala mbalimbali kuhusu ushirikiano kati ya Umoja wa Mataifa na Serikali ya Tanzania pamoja na utekelezaji wa Malengo ya Maendeleo Endelevu (SDG's) hapa nchini. Kwa upande wake, Prof. Mkenda alipongeza Mpango wa One UN unaotekelezwa na Ofisi za Umoja wa Mataifa hapa nchini kwa vile unarahisisha utekelezaji wa majukumu na kushukuru ushirikiano mzuri uliopo kati ya Umoja wa Mataifa na Tanzania hususan katika program za kupunguza umaskini na maendeleo endelevu.

Mkurugenzi wa Idara ya Ushirikiano wa Kimatifa katika Wizara ya Mambo ya Nje na Ushirikiano wa Afrika Mashariki, Balozi Celestine Mushy akiwa na Afisa Mambo ya Nje, Bi. Eva Ng'itu wakifuatilia mazungumzo kati ya Prof. Mkenda na Bw. Rodriguez hawapo pichani

Bw. Rodriguez nae akimweleza jambo Prof. Mkenda

Mazungumzo yakiendelea

Picha ya pamoja

Katibu Mkuu wa Mambo ya Nje akutana na Mwakilishi Mkazi wa WFP nchini

Katibu Mkuu wa Wizara ya Mambo ya Nje na Ushirikiano wa Afrika Mashariki, Prof. Adolf Mkenda (kulia) akizungumza na Mwakilishi Mkazi wa Shirika la Mpango wa Chakula Duniani (WFP) nchini, Bw. Michael Dunford alipofika Wizarani kwa ajili ya kuzungumzia masuala mbalimbali kuhusu utekelezaji wa majukumu unaofanywa na Shirika hilo hapa nchini. Pamoja na mambo mengine Mwakilishi huyo aliishukuru Serikali ya Tanzania kwa ushirikiano mkubwa anaopata katika kutekeleza majukumu yake. Shirika la WFP hapa nchini linajishughulisha katika kusaidia miradi mbalimbali ya kilimo katika kuwajengea uwezo wakulima wadogo, lishe na kusaidia upatikanaji wa soko kwa wakulima wadogo.

Mkurugenzi wa Idara ya Ushirikiano wa Kimatifa katika Wizara ya Mambo ya Nje na Ushirikiano wa Afrika Mashariki, Balozi Celestine Mushy kwa pamoja na Afisa Mambo ya Nje, Bi. Eva Ng'itu wakifuatilia mazungumzo kati ya Prof. Mkenda na Bw. Dunford hawapo pichani

Bw. Dunford akifafanua jambo kwa Prof. Mkenda wakati wa mazungumzo yao

Mazungumzo yakiendelea

Prof. Mkenda akiagana na Bw. Dunford mara baada ya mazungumzo kati yao

Mzigo wa kwanza wa Muhogo mkavu kutoka Tanzania waingia China.

 

 Kufuatia hatua ya kusainiwa Mkataba kati ya Serikali ya Tanzania na China kuruhusu bidhaa za Muhogo mkavu kutoka Tanzania kuingia katika soko la china, mzigo wa kwanza wa kontena nne(4) za muhogo mkavu kutoka Tanzania zimeingia China wiki hii kupitia Bandari ya Qingdao. Tukio hili la Kihistoria linafungua ukurasa mpya wa zao la muhogo kuwa miongoni mwa mazao ya biashara, hivyo Serikali inawahimiza Watanzania kuchangamkia fursa hii.

 Sehemu ya magunia yenye muhogo huo kutoka Tanzania yakipakuliwa.

 

Sehemu ya Muhogo huo.

Naibu Katibu Mkuu akutana na kufanya mazungumzo na Balozi wa Poland nchini

 Naibu Katibu Mkuu Balozi Ramadhan M. Mwinyi, akiwa katika mazungumzo na Balozi wa Poland nchini Mhe. Krzysztof Buzalski alipomtembelea Wizarani tarehe 07 Juni,2018, Dar es Salaam, 

Mazungumzo hayo pamoja na mambo mengine yalijikita katika kuboresha mahusiano yaliyopo kati ya Tanzania na Poland. Balozi Mwinyi alisema Poland ni kati ya nchi ambazo Mahusiano yake yameleta manufaa katika nyanja mbalimbali za uchumi hapa nchini, hasa katika eneo la kuendeleza kilimo cha kisasa. Itakumbukwa hivi karibuni nchi ya Poland  imetoa mkopo wenye masharti nafuu kwa ajili ya ujenzi wa maghala yanayotumia teknologia ya kisasa kuhifadhi nafaka katika Mikoa mitano(5) hapa nchini.

Naye Balozi Buzalski alisema Poland inafurahishwa na Juhudi za Serikali ya awamu ya tano(5) ya Kujenga Tanzania ya Viwanda na amesema kilimo ni kati ya eneo muhimu ambalo litasaidia Tanzania kufikia adhma hiyo kwa haraka ndio maana wameamua kuongeza nguvu kwenye eneo hili nyeti. 

Ili kuwajengea uwezo Watanzania Poland imefungua tena fursa za masomo nchini humo katika maeneo mbalimbali hivyo Watanzania wanashauriwa kuchangamkia fursa hizo zitakapotangazwa . 

Aidha, Balozi Buzalski pia amesema eneo lingine muhimu ni katika sekta ya utalii ambapo hadi sasa watalii kutoka Poland wameongezeka maradufu ambapo jumla ya watalii 12,000 kutoka Poland wanatembelea Tanzania kwa Mwaka na kati ya hao Watalii 10,000 wanaenda Zanzibar.

 

 Mkutano ukiendelea, wanofuatilia kulia ni Kaimu Mkurugenzi wa Idara ya Europe na Amerika Bi Mona Mahecha na kushoto ni Naibu Balozi wa Poland Bi.Awelina Lubieniecka.

 

 Balozi Mwinyi akiagana na mgeni wake Balozi Buzalski baada ya mazungumzo.

Wizara ya Ulinzi ya Tanzania yasaini Mkataba wa Makubaliano na Serikali ya Israel

Mkuu wa Tawi la Usalama na Utambuzi Jeshini Brigedia Jenerali, Nicodemus Elias Mwangela pamoja na Mkuu wa Idara ya Ushirikiano wa Kimataifa kwenye masuala ya Ulinzi katika Wizara ya Ulinzi ya Israel, Brigedia  Jenerali Mstaafu, Michael Ben-Baruch wakiwekeana saini katika Mkataba wa Makubaliano ya pamoja ya Ulinzi kati ya Wizara ya Ulinzi na Jeshi la Kujenga Taifa la Tanzania na Wizara ya Ulinzi ya Taifa la Israel, tukio hilo limehudhuriwa na Waziri wa Ulinzi na Jeshi la Kujenga Taifa la Tanzania, Mhe. Hussein Mwinyi, Katibu Mkuu wa Wizara ya Ulinzi Dkt. Florens Turuka, Balozi wa Israel nchini Kenya awakilisha pia Tanzania, Kaimu Mkurugenzi wa Idara ya Mashariki ya Kati Bw. Suleiman Salehe pamoja na viongozi wa Jeshi la Kujenga Taifa la Tanzania.Tukio hilo limefanyika katika ukumbi wa Mikutano uliopo Makao Makuu ya Jeshi 

Brigedia Jenerali Nicodemus Elias Mwangela (kulia) pamoja na Brigedia Jenarali Mstaafu Michael Ben-Baruch wakibadilishana mikataba hiyo mara baada ya kumaliza zoezi la kuwekeana saini.

Brigedia Jenerali Nicodemus Elias Mwangela akimkabidhi Brigedia Jenerali Michael Ben- Baruch zawadi ya Nembo ya Jeshi la Kujenga Taifa la JWTZ

Brigedia Jenerali Nicodemus Elias Mwangela (wa sita kulia) pamoja na Brigedia Jenerali Mstaafu, Michael Ben- Baruch (wa saba kutoka kushoto), wakiwa katika picha ya pamoja na viongozi mbalimbali wa Serikali ya Tanzania na Israel pamoja na Balozi wa Israel nchini Kenya ambaye anawakilisha Tanzania.

Umoja wa Mataifa wawatunukia Watanzania medali ya walinda amani

Mhe.Balozi Modest J. Mero (katikati) Mwakilishi wa Kudumu wa  Tanzania kwenye Umoja wa Mataifa, akionesha medali aliyoipokea kutoka Umoja wa Mataifa kwa niaba ya Watanzania walioshiriki katika shughuli za ulinzi wa amani.

Muonekano wa medali

Mhe.Balozi Modest J. Mero (katikati) Mwakilishi wa Kudumu wa  Tanzania kwenye Umoja wa Mataifa akiwa katika picha mara baada ya kupokea medali