WATUMISHI WA WIZARA YA MAMBO YA NJE WASHIRIKI BONANZA LA MICHEZO

Timu ya mpira ya miguu ikiongozwa na nahodha wake Mkurugenzi wa Siasa, Ulinzi na Usalama katika Wizara ya Mambo ya Nje na Ushirikiano wa Afrika Mashariki Balozi Stephen Mbundi wakiwa kwenye picha ya pamoja muda mfupi kabla ya kuwakabili wapinzania wao kwenye bonanza la michezo lililofanyika katika uwanja wa Dodoma Sekondari jijini Dodoma.

Watumishi wa Wizara ya Mambo ya Nje na Ushirikiano wa Afrika Mashariki leo tarehe 7/7/2023 kwa shauku na morali ya hali juu wameshiriki bonanza la michezo lililofanyika kwenye uwanja wa Dodoma Sekondari jijini Dodoma.

Bonanza hilo ambalo limeandaliwa na Wizara limehusisha michezo mbalimbali kama vile mazoezi ya pamoja ya viungo, mpira wa miguu, mpira wa pete na riadha.

Bonanza hilo pamoja na masuala mengine lililenga kuhamasisha upimaji wa afya kwa watumishi wake hususani kwa Magonjwa Sugu Yasiyoabukiza (MSY), ikiwa ni miongoni mwa hatua mbalimbali zinazoendelea kuchukuliwa na Wizara katika utekelezaji wa Afua za VVU na MSY kwa mujibu wa Mwongozo wa Kudhibiti VVU, UKIMWI na Magonjwa Sugu Yasiyoambukiza wa mwaka 2014. 

Kwa upande wake Mkurugenzi wa Utawala na Usimamizi Rasilimali Watu katika Wizara ya Mambo ya Nje na Ushirikiano wa Afrika Mashariki Bi. Chiku Kiguhe ameeleza kuridhishwa kwake na namna watumishi walivyohamasika kushiriki zoezi la upimaji afya na michezo ya pamoja. Vilevile, ametumia fursa hiyo kutoa wito kwa Watumishi wa Wizara kuendelea kujitokeza kwa wingi katika kushiriki michezo, kupima afya mara kwa mara na kuzingatia ushauri na miongozo inayotolewa na wataalam wa afya kuhusu masuala mbalimbali yanayolenga kuboresha afya zao. 

Watumishi wa Wizara waliojitokeza katika bonanza hilo kwa nyakati tofauti wameeleza furaha yao kuhusu namna Uongozi wa Wizara unavyozigatia na kujali suala la utimamu wa afya ya Watumishi wake, hususani kwa kuandaa programu mbalimbali za mara kwa mara ikiwemo michezo, elimu kuhusu masuala ya afya na upimaji. 

Wachezaji wa mpira wa miguu wakiwania mpira kwenye bonanza la michezo lililofanyika katika uwanja wa Dodoma Sekondari jijini Dodoma.

Wachezaji wa mpira wa pete wakiwania mpira 

kwenye bonanza la michezo lililofanyika katika uwanja wa Dodoma Sekondari jijini Dodoma.

Washiriki wa michezo wakiwa katika hali ya furaha kwenye ufunguzi wa Bonanza la michezo lililofanyika katika uwanja wa Dodoma Sekondari jijini Dodoma

Mkurugenzi wa Siasa, Ulinzi na Usalama katika Wizara ya Mambo ya Nje na Ushirikiano wa Afrika Mashariki Balozi Stephen Mbundi akianzisha mpira kwneye bonanza la michezo lililofanyika katika uwanja wa Dodoma Sekondari jijini Dodoma

Washiriki wa michezo wakiwa katika hali ya furaha kwenye ufunguzi wa Bonanza la michezo lililofanyika katika uwanja wa Dodoma Sekondari jijini Dodoma

Mkurugenzi wa Utawala na Usimamizi Rasilimali Watu katika Wizara ya Mambo ya Nje na Ushirikiano wa Afrika Mashariki Bi. Chiku Kiguhe akiwatoka wapinzani kwenye mpira wa pete katika bonanza la michezo lililofanyika katika uwanja wa Dodoma Sekondari jijini Dodoma.

Mchezo wa mpira wa miguu ukiendelea

HON. DR. SALIM AHMED SALIM AWARDED ORDER OF AMILCAR CABRAL BY THE GOVERNMENT OF THE REPUBLIC OF CAPE VERDE

 

TANZANIA, MAREKANI KUIMARISHA USHIRIKIANO ZAIDI

Tanzania na Marekani zimeahidi kuendelea kuimarisha ushirikiano zaidi katika sekta za biashara na uwekezaji ili kukuza uchumi baina ya mataifa hayo.

Ahadi hiyo imetolewa na Katibu Mkuu, Wizara ya Mambo ya Nje na Ushirikiano wa Afrika Mashariki, Balozi Dkt. Samwel Shelukindo alipomwakilisha Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax (Mb.) katika maadhimisho ya miaka 247 ya uhuru wa Marekani na Miaka 62 ya Ushirikiano wa Marekani na Tanzania yaliyofanyika tarehe 04 Julai 2023 jioni nyumbani kwa Balozi wa Marekani nchini Jijini Dar es Salaam. 

Dkt. Shelukindo alisema Tanzania na Marekani zimekuwa zikifanya kazi pamoja katika kukuza ushirikiano wa kibiashara na uwekezaji, ambapo Tanzania imeendelea kuvutia wawekezaji na wauzaji bidhaa kutoka Marekani na Tanzania imekuwa ikisafirisha bidhaa za nguo kwenda Marekani chini ya Mpango wa Ukuzaji fursa za kiuchumi Afrika (AGOA).

“Takwimu zinaonesha kuwa uagizaji wa bidhaa kutoka Marekani umeongezeka kutoka Dola za Marekani milioni 201.8 mwaka kwa 2017 hadi Dola za Marekani milioni 215 mwaka 2022. Pia, katika miaka ya hivi karibuni, mauzo ya nje kutoka Tanzania kwenda Marekani yameongezeka kutoka Dola za Marekani milioni 9.7 mwaka 2017 kufikia Dola za Marekani milioni 49.5 mwaka 2022,” alisema Dkt. Shelukindo. 

Balozi Shelukindo aliongeza kuwa Serikali ya Awamu ya Sita imeboresha mazingira ya biashara na uwekezaji ili kuwavutia zaidi wafanyabiashara na wawekezaji nchini na kuwawezesha Watanzania kufanya biashara katika mazingira mazuri na rafiki. 

“Kuanzia mwaka 1997 hadi 2023, Marekani imefanya uwekezaji nchini Tanzania wenye thamani ya Dola za Marekani bilioni 4.8 katika sekta za Kilimo, Nishati, Taasisi za Fedha, Rasilimali Watu, Uzalishaji Asili, Maliasili, Madini, Mawasiliano, Utalii na Uchukuzi, uwekezaji huo umezalisha ajira zaidi ya 54,900 nchini,” alisema Balozi Shelukindo. 

Pamoja na mambo mengine, Dkt. Shelukindo aliwakaribisha wawekezaji zaidi kutoka Marekani kuwekeza katika sekta mbalimbali zikiwemo nishati mbadala, viwanda vya magari, viwanda vya dawa, mafuta ya kula, viwanda vya pamba na nguo, kilimo, utalii, mifugo, uvuvi, Samaki, madini na miundombinu.

Kwa upande wake Balozi wa Marekani nchini, Mhe. Michael Battle alisema ushirikiano wa kidiplomasia kati ya Marekani na Tanzania ni wa muda mrefu na umekuwa imara tangu ulipoanzishwa.

Mhe. Balozi Battle aliongeza kuwa wakati Marekani inasherekea maadhimisho ya miaka 247 na miaka 62 ya ushirikiano wa kidiplomasia kati yake na Tanzania ni vyema kuendeleza ushirikiano baina ya mataifa hayo na kuhakikisha wananchi wanapata mambo ya msingi hususan elimu, kazi, afya, ulinzi, usalama, utawala wa sheria, kuheshimu haki za binadamu na diplomasia inayounganisha kwa manufaa ya baadae ya wananchi wote.

“Marekani tumedhamiria kufanya biashara na uwekezaji na Tanzania kwa maslahi mapana ya nchi zetu. Uwekezaji katika sekta hiyo bila shaka utachangia kuboresha zaidi uchumi wa Tanzania,” alisema Mhe. Balozi Battle 

“Uhusiano wetu na Tanzania umedumu kwa takribani miaka 62…..tulisimama na Tanzania, tumesimama na Tanzania na tutaendelea kushirikiana na Tanzania katika nyakati zote,” aliongeza Mhe. Balozi Battle. 

Tanzania na Marekani zimekuwa zikishirikiana katika sekta za Afya, Kilimo, Nishati, Taasisi za Fedha, Rasilimali Watu, Uzalishaji Asili, Maliasili, Madini, Mawasiliano, Utalii na Uchukuzi.

Katibu Mkuu, Wizara ya Mambo ya Nje na Ushirikiano wa Afrika Mashariki, Balozi Dkt. Samwel Shelukindo akihutubia katika maadhimisho ya miaka 247 ya uhuru wa Marekani na Miaka 62 ya Ushirikiano wa Marekani na Tanzania yaliyofanyika tarehe 04 Julai 2023 jioni nyumbani kwa Balozi wa Marekani nchini Jijini Dar es Salaam

Balozi wa Marekani nchini, Mhe. Michael Battle akizungumza katika maadhimisho ya miaka 247 ya uhuru wa Marekani na Miaka 62 ya Ushirikiano wa Marekani na Tanzania yaliyofanyika tarehe 04 Julai 2023 jioni Jijini Dar es Salaam

Katibu Mkuu, Wizara ya Mambo ya Nje na Ushirikiano wa Afrika Mashariki, Balozi Dkt. Samwel Shelukindo akisalimiana na Balozi wa Marekani nchini, Mhe. Michael Battle baada ya kuwasili nyumbani kwa Balozi huyo Jijini Dar es Salaam

sehemu ya Mabalozi, Wawakilishi wa Mashirika ya Kimataifa na wananchi mbalimbali wakifuatilia maadhimisho ya miaka 247 ya uhuru wa Marekani na Miaka 62 ya Ushirikiano wa Marekani na Tanzania Jijini Dar es Salaam

Katibu Mkuu, Wizara ya Mambo ya Nje na Ushirikiano wa Afrika Mashariki, Balozi Dkt. Samwel Shelukindo katika picha ya pamoja na Balozi wa Marekani nchini, Mhe. Michael Battle

BALOZI KAYOLA AWASILISHA HATI ZA UTAMBULISHO KWA RAIS WA MALAWI

Balozi wa Jamhuri ya Muungano wa Tanzania nchini Malawi, Mheshimiwa Agnes Kayola amewasilisha Hati za Utambulisho kwa Rais wa Jamhuri ya Malawi, Mheshimiwa Lazarus Chakwera, tarehe 04 Julai 2023 Ikulu, Jijini Lilongwe Malawi.

Julai 1, 2023 Rais wa Jamhuri ya Muungano wa Tanzania, Mheshimiwa Dkt. Samia Suluhu alimteua Balozi Kayola kuwa Balozi wa Jamhuri ya Muungano wa Tanzania nchini Malawi. 

Rais wa Jamhuri ya Malawi, Mheshimiwa Lazarus Chakwera akipokea Hati za Utambulisho kutoka kwa Balozi wa Jamhuri ya Muungano wa Tanzania nchini Malawi, Mheshimiwa Agnes Kayola tarehe 04 Julai 2023 Ikulu, Jijini Lilongwe Malawi

Rais wa Jamhuri ya Malawi, Mheshimiwa Lazarus Chakwera akimpongeza Balozi wa Jamhuri ya Muungano wa Tanzania nchini Malawi, Mheshimiwa Agnes Kayola mara baada ya kuwasilisha Hati za Utambulisho, Ikulu Jijini Lilongwe

Picha ya Pamoja

TANZANIA YAIOMBA INDIA ISAIDIE SEKTA YA UCHUMI WA BULUU

Katibu Mkuu wa Wizara ya Mambo ya Nje na Ushirikiano Afrika Mashariki, Balozi Dkt. Samwel Shelukindo ameiomba Serikali ya India ishirikiane na Tanzania katika jitihada zake za kukuza sekta ya uchumi wa Buluu ambayo ni moja ya sekta ya vipaumbele vya Serikali ya Awamu ya Sita inayongoozwa na Rais Dkt. Samia Suluhu Hassan.

Amesema hayo wakati wa Mkutano wa 10 wa Tume ya Pamoja ya Ushirikiano katika masuala ya uchumi, ufundi na sayansi kati ya Tanzania na India uliofanyika kwa njia ya mtandao tarehe 26 Juni 2023. 

Napendekeza Serikali ya India ianzishe ushirikiano na Tanzania katika kuendeleza sekta ya uchumi wa buluu hususan, uvuvi kwenye bahari kuu, uendelezaji wa viwanda vya kusindika samaki, utafutaji na uokoaji, utengenezaji wa boat na vifaa vya kutengenezea boat”, Balozi Shelukindo alisema.

Balozi Shelukindo aliitaja India kama Mshirika mkubwa na muhimu wa Tanzania katika sekta mbalimbali kama za biashara, uwekezaji, uendelezaji wa miundombinu, ulinzi, elimu na elimu ya ufundi. Alithibitisha hilo kwa kubainisha kuwa India ni nchi ya tatu kwa kufanya biashara na Tanzania, ambapo takwimu zilipo zinaonesha kuwa biashara kati ya nchi hizo mbili kwa mwaka 2021 – 2022 ilikuwa na thamani ya Dola za Marekani bilioni 6. 

Aidha, Dkt. Shelukindo alisema India ni moja ya nchi 5 zinazoongoza kwa uwekezaji nchini kwa kuwa na miradi yenye thamani ya Dola za Marekani bilioni 3.68, huku takwimu za Kituo cha Uwekezaji Tanzania zikionesha nchi hiyo kwa mwaka 2021 – 2022 imeandikisha miradi 630 iliyotoa ajira mpya zaidi ya 60,000.

Katibu Mkuu alitumia kikao hicho kuishukuru India kwa misaada mbalimbali inayoipatia Tanzania katika maeneo mbalimbali ikiwa ni pamoja na sekta ya maji. Alisema Serikali ya Tanzania inathamini mchango wa India kwa kutoa mikopo ya masharti nafuu ya Dola za Marekani Bilioni moja kwa ajili ya kuendeleza miradi ya maji nchini ambapo mwezi Juni 2022, kampuni sita zilisaini ujenzi wa miradi ya maji yenye thamani ya Dola milioni 500 kwenye miji 28 itakayofaidisha zaidi ya watu milioni sita, ujenzi wake utakapokamilia. 

Wajumbe wa Mkutano huo ambao walikuwa Makatibu Wakuu wa Wizara, Naibu Makatibu Wakuu au wawakilishi wao walipendekeza maeneo mapya ya ushirikiano na India katika sekta za kilimo, TEHAMA, maji, michezo na utamaduni, biashara na uwekezaji ambapo sekta husika zimeelekezwa kuandaa rasimu za Mikataba ya Makubaliano (MoUs) ili ijadiliwe na ikiridhiwa iweze kusainiwa na pande zote mbili.

Kwa upande wake, Kiongozi wa ujumbe wa India katika Mkutano huo ambaye ni Kaimu Katibu Mkuu wa Wizara ya Mambo ya Nje ya nchi hiyo, Balozi Punnet Roy Kundal aliahidi kuwa Serikali ya India itaendelea kushirikiana na Tanzania na kusisitiza umuhimu wa pande zote mbili kukamilisha MoUs ambazo bado hazijasainiwa ili ziweze kusaininiwa kwa ajili ya utekelezaji.

Alihitimisha hotuba yake kwa kueleza kuwa wakati Serikali mbili zikisubiri taratibu zikamilike ili zisaini MoU kuhusu kilimo, nchi hiyo imetoa ruhusa kwa Tanzania kuuza nchini India tani 200,000 za mbaazi kwa mwaka.

Katibu Mkuu wa Wizara ya Mambo ya Nje na Ushirikiano Afrika Mashariki, Balozi Dkt. Samwel Shelukindo akitoa hotuba ya ufunguzi kwenye Mkutano wa 10 wa Tume ya Pamoja ya Ushirikiano katika masuala ya uchumi, ufundi na sayansi kati ya Tanzania na India uliofanyika kwa njia ya mtandao

Mkutano wa 10 wa Tume ya Pamoja ya Ushirikiano katika masuala ya uchumi, ufundi na sayansi kati ya Tanzania na India uliofanyika kwa njia ya mtandao ukiendelea

Sehemu ya Ujumbe wa Tanzania wakifuatilia Mkutano wa 10 wa Tume ya Pamoja ya Ushirikiano katika masuala ya uchumi, ufundi na sayansi kati ya Tanzania na India uliokuwa ukiendelea kwa njia ya mtandao

DR. TAX AFANYA ZIARA CHUO CHA DIPLOMASIA INDONESIA

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax (Mb.) akiwa anaendelea na ziara yake nchini Indonesia, ametembelea Chuo Cha Diplomasia cha Indonesia.

Waziri Tax pamoja na ujumbe wake, walipokelewa chuoni hapo na Mkuu wa Chuo hicho, Bw. Mohammad Koba.

Kufuatia ziara hiyo, Tanzania na Indonesia zimekubaliana kuanzisha ushirikiano baina ya Vyuo vya Kidiplomasia, ikiwa ni pamoja na kubadilishana uzoefu katika maeneo mbalimbali ikiwemo uendeshaji wa chuo na Program za mafunzo kwa Wanadiplomasia, na kubadilishama ujuzi kwa walimu na wanafunzi wa vyuo hivyo.

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax (Mb.) akisalimiana na viongozi wa Chuo Cha Diplomasia cha Indonesia baada ya kuwasili chuoni hapo kwa ziara

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax (Mb.) akizungumza na uongozi wa Chuo Cha Diplomasia cha Indonesia 

Mkuu wa Chuo cha Diplomasi cha Indonesia, Bw. Mohammad Koba akielezea historia ya chuo kwa Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax (hayupo pichani)

Mkuu wa Chuo cha Diplomasi cha Indonesia, Bw. Mohammad Koba akimkabidhi zawadi Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax katika picha ya pamoja na ujumbe wake pamoja na Mkuu wa Chuo cha Diplomasia Indonesia Bw. Mohammad Koba pamoja na Balozi wa Indonesia nchini Tanzania Mhe. Tri Yogo Jatmiko 

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax akimsikiliza moja kati ya wakufunzi kutoka Chuo cha Diplomasia Indonesia Bibi. Renata Siagian

TANZANIA YAFUNGUA RASMI UBALOZI WAKE NCHINI INDONESIA

Serikali ya Jamhuri ya Muungano wa Tanzania imefungua rasmi Ubalozi wake Jijini Jakarta nchini Indonesia.

Akizungumza katika hafla ya uzinduzi wa Ubalozi huo, Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax (Mb.) amesema kufunguliwa kwa Ubalozi huo kutaziwezesha Serikali ya Tanzania na Serikali ya Indonesia kukuza na kuimarisha uhusiano wake wa kidiplomasia na kukuza uchumi.

“Tanzania imekuwa ikishirikiana kwa karibu na Indonesia hivyo tunaamini kuwa kufunguliwa rasmi kwa ubalozi wetu Jijini hapa kutaongeza ushirikiano zaidi baina ya mataifa yetu mawili hususan katika sekta ya uchumi,” alisema Dkt. Tax

Waziri Tax ameongeza kuwa Indonesia imefika mbali kiuchumi, hivyo ushirikiano wake na Tanzania utatoa fursa kwa Tanzania kupiga hatua na kuhakikisha bidhaa za mazao ya kilimo na madini zinaongezwa thamani na kuuzwa katika masoko mbalimbali ya kimataifa na kuiwezesha Tanzania kukuza uchumi wake.

Pamoja na mambo mengine, Dkt. Tax ameishukuru Serikali ya Indonesia kwa ushirikiano mkubwa ambao imekua ikiupatia Ubalozi wa Tanzania, Jakarta tangu ubalozi huo ulipoanzishwa nchini humo mwaka 2022 hadi ulipozinduliwa rasmi leo tarehe 22 Juni, 2023.

Kwa upande wake, Waziri wa Mambo ya Nje wa Indonesia Mhe.  Retno Marsudi amesema, Indonesia na Tanzania zimekuwa na ushirikiano mzuri wa muda mrefu na imara ulioanzishwa na waasisi wa mataifa hayo mawili (Mwl. Julius Nyerere na Rais Sukarno) tangu mkutano wa Bandung uliofanyika mwaka 1955.

Waziri Marsudi alisema kuwa muda wote huo, Serikali hizo mbili zimekuwa zikifanya kazi kwa pamoja na kwa karibu katika maeneno mbalimbali….“Leo najisikia faraja sana kwa Tanzania kufungua rasmi ubalozi wake hapa Jakarta. Hii ni ishara ya kuimarisha zaidi ushirikiano baina ya Indeonesia na Tanzania,” amesema Mhe. Marsudi.

Alisema kufunguliwa kwa ubalozi huo kunaonesha kuimarishwa zaidi kwa uhusiano wa kidiplomasia uliopo kati ya Tanzania na Indonesia na kuahidi kuwa yeye na timu yake wataendelea kushirikiana na Tanzania kukuza na kuimarisha uhusiano uliopo kati ya nchi hizo.

“Kufunguliwa rasmi kwa ubalozi huu leo ni ishara ya kuimarisha zaidi uhusiano wetu wa kidiplomasia kati ya Indonesia na Tanzania, mimi pamoja na timu yangu tunaahidi kuendelea kushirikiana na Tanzania katika kukuza na kuimarisha uhusiano wetu,” ameongeza Mhe. Marsudi.

Hafla ya uzinduzi wa Ubalozi huo imehudhuriwa na Mabalozi na Wawakilishi wa Mashirika ya Kimataifa waliopo Jakarta, Indonesia.

Tanzania na Indonesia zilianzisha rasmi uhusiano wa kidiplomasia mwaka 1964, ambapo mwaka huo Ubalozi wa Indonesia ulifunguliwa rasmi nchini Tanzania. Aidha, kabla ya kufunguliwa kwa ubalozi wa Tanzania nchini Indonesia, Tanzania imekuwa ikiwakilishwa kutoka ubalozi wa Tanzania uliopo Kuala Lumpur, Malaysia.

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax akihutubia katika hafla ya ufunguzi rasmi wa Ubalozi wa Jamhuri ya Muungano wa Tanzania - Jakarta nchini Indonesia

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax akihutubia katika hafla ya ufunguzi rasmi wa Ubalozi wa Jamhuri ya Muungano wa Tanzania - Jakarta nchini Indonesia

Waziri wa Mambo ya Nje wa Indonesia Mhe.  Retno Marsudi akizungumza wakati wa hafla ya ufunguzi rasmi wa Ubalozi wa Jamhuri ya Muungano wa Tanzania – Jakarta nchini Indonesia

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax na mwenyeji wake Waziri wa Mambo ya Nje wa Indonesia Mhe.  Retno Marsudi wakifungua rasmi Ubalozi wa Jamhuri ya Muungano wa Tanzania – Jakarta nchini Indonesia

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax pamoja na mwenyeji wake Waziri wa Mambo ya Nje wa Indonesia, Mhe.  Retno Marsudi wakifurahia baada ya kufungua rasmi Ubalozi wa Jamhuri ya Muungano wa Tanzania – Jakarta nchini Indonesia

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax pamoja na mwenyeji wake Waziri wa Mambo ya Nje wa Indonesia, Mhe.  Retno Marsudi wakikata utepe kuashiria ufunguzi rasmi wa Ubalozi wa Jamhuri ya Muungano wa Tanzania – Jakarta nchini Indonesia

Balozi wa Tanzania nchini Indonesia, Mhe. Macocha Tembele akitoa salamu za ubalozi wakati wa hafla ya ufunguzi rasmi wa Ubalozi wa Jamhuri ya Muungano wa Tanzania – Jakarta nchini Indonesia

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax pamoja na mwenyeji wake Waziri wa Mambo ya Nje wa Indonesia, Mhe.  Retno Marsudi wakigonga glasi kuashiria ufunguzi rasmi wa Ubalozi wa Jamhuri ya Muungano wa Tanzania – Jakarta nchini Indonesia

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax pamoja na mwenyeji wake Waziri wa Mambo ya Nje wa Indonesia Mhe.  Retno Marsudi wakiwa katika picha ya pamoja na viongozi mbalimbali kutoka Tanzania na Indonesia 

TANZANIA KUFUNGUA RASMI UBALOZI INDONESIA

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax (Mb.) amewasili Jakarta nchini Indonesia kwa ajili ya ziara ya kikazi, ikiwa ni pamoja na kufungua rasmi Ofisi za Ubalozi wa Jamhuri ya Muungano wa Tanzania nchini humo hapo Tarehe 22 Juni, 2023.

Mhe. Dkt. Tax baada ya kuwasili Jakarta amepokelewa na Balozi wa Tanzania nchini Indonesia, Mhe. Macocha Tembele katika Uwanja wa Ndege wa Kimataifa wa Soekarno-Hatta (CGK).

Akiwa nchini Indonesia Mhe. Dkt. Tax anatarajia pia kukutana na kufanya mazungumzo na Waziri wa Mambo ya Nje wa Indonesia, Mhe. Retno Marsudi, na kutembelea Chuo cha Diplomasia cha Indonesia.

WAZIRI TAX AWAAGA MABALOZI WA EU, UJERUMANI NA NORWAY

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax (Mb.) amekutana na kuwaaga mabalozi watatu waliokuwa wanaziwakilisha nchi zao hapa nchini baada ya kumaliza muda wao wa uwakilishi.

Dkt. Tax amewaaga mabalozi hao katika Ofisi Ndogo za Wizara Jijini Dar es Salaam. Mabalozi walioagwa ni Balozi wa Jumuiya ya Umoja wa Ulaya nchini, Mhe. Manfredo Fanti, Balozi wa Ujerumani nchini Mhe. Regine Hess pamoja na Balozi wa Norway Nchini Mhe.  Elisabeth Jacobsen.

Awali Mhe. Tax alimpongeza Balozi wa Umoja wa Ulaya Nchini, Mhe. Fanti kwa ushirikiano alioutoa kwa Serikali ya Tanzania wakati wa uwakilishi wake na kumuahidi kuwa Tanzania itaendelea kushirikiana na Umoja wa Ulaya wakati wote hususani katika sekta ya biashara na uwekezaji.

“Nakupongeza kwa kazi nzuri na kubwa uliyoifanya wakati wa uwakilishi wako hapa nchini, ambapo umefanikiwa kuimarisha uhusiano mzuri baina ya Tanzania na Umoja wa Ulaya katika sekta ya siasa pamoja na uchumi. Kupitia muda wako wa uwakilishi, wote tumeshuhudia mazingira mazuri ya biashara na uwekezaji kati ya Tanzania na Umoja wa Ulaya yakiimarika. 

Pia tumekuwa na makongamano kadhaa ya biashara yaliyowakutanisha wafanyabishara wa mataifa yetu na kujadili fursa za biashara baina ya mataifa yetu,” alisema Dkt. Tax

Naye Balozi Fanti ameishukuru Tanzania kwa ushirikiano iliompatia wakati wote wa uwakilishi na kuahidi kuwa ataendelea kuwa Balozi bora wa Tanzania.

Kadhalika, Dkt. Tax amemuaga Balozi wa Ujerumani nchini hapa nchini Mhe. Regine Hess. Waziri Tax alimshukuru kwa ushirikiano aliouonesha kwa Serikali ya Tanzania wakati wa uwakilishi wake hapa nchini.

“Tanzania tunakushukuru kwa ushirikiano wako wakati wote wa uwakilishi wako hapa nchini, ushirikiano wetu (Tanzania na Ujerumani) umekuwa imara na bora wakati wote na tunaamini utaendelea kuimarika,” alisema Dkt. Tax

Naye Balozi Hess alisema kuwa anaondoka akiwa na faraja ya kuona masuala ya utawala bora, haki za binadamu pamoja na amani na usalama yakiwa yameboreshwa kwa kiasi kikubwa. 

Katika tukio jingine, Dkt. Tax amekutana na kumuaga Balozi wa Norway nchini, Mhe. Elisabeth Jacobsen ambapo ameishukuru Serikali ya Tanzania kwa kumpa ushirikiano wakati wa kipindi chake cha uwakilishi hapa nchini.

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax akizungumza na Balozi wa Jumuiya ya Umoja wa Ulaya nchini, Mhe. Manfredo Fanti baada ya kumaliza muda wake wa uwakilishi nchini. Dkt. Tax amemuaga Balozi Fanti katika Ofisi Ndogo za Wizara Jijini Dar es Salaam.

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax akimkabidhi zawadi ya picha na Balozi wa Jumuiya ya Umoja wa Ulaya nchini, Mhe. Manfredo Fanti baada ya kumaliza muda wao wa uwakilishi nchini

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax akimsikiliza Balozi wa Ujerumani nchini Mhe. Regine Hess baada ya kumaliza muda wake wa uwakilishi nchini. Dkt. Tax amemuaga Balozi Hess katika Ofisi Ndogo za Wizara Jijini Dar es Salaam.

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax akiagana akizungumza na Balozi wa Norway Nchini Mhe.  Elisabeth Jacobsen katika Ofisi Ndogo za Wizara Jijini Dar es Salaam. Balozi Elisabeth amemaliza muda wake wa uwakilishi nchini.  

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax katika picha ya pamoja na Balozi wa Norway Nchini Mhe.  Elisabeth Jacobsen katika Ofisi Ndogo za Wizara Jijini Dar es Salaam. Wengine pichani ni Mkurugenzi wa Idaya ya Ulaya na Amerika kutoka Wizara ya Mambo ya Nje na Ushirikiano wa Afrika Mashariki, Balozi Swahiba Mndeme (mwenye koti jeupe) pamoja na maafisa kutoka Wizara ya Mambo ya Nje na Ushirikiano wa Afrika Mashariki na Ubalozi wa Norway.