MHE. RAIS SAMIA ATUNUKIWA SHAHADA YA HESHIMA YA UDAKTARI NCHINI UTURUKI

Rais wa Jamhuri ya Muungano wa Tanzania, Mhe. Dkt Samia Suluhu ametunukiwa Shahada ya Heshima ya Udaktari (Honoris Causa) katika Uchumi na Chuo Kikuu cha Ankara cha nchini Uturuki ikiwa ni ishara ya kutambua mchango wake katika kuboresha maisha ya watanzania kupitia mageuzi mbalimbali pamoja na kuimarisha ushirikiano wa kiuchumi na nchi mbaimbali duniani ikiwemo Uturuki. Akizungumza kupokea tuzo hiyo kwenye hafla iliyofanyika katika Chuo hicho jijini Ankara leo tarehe 18 Aprili 2024, Mhe. Rais Samia amelishukuru Baraza la Chuo kwa kumpatia heshima hiyo kubwa kwake na kwa Watanzania wake kwa waume na  kukipongeza Chuo hicho kwa kuendelea kutoa elimu yenye ubora na kuiweka Uturuki kuwa miongoni mwa nchi zinazotoa elimu ya juu bora duniani.   “Nilipopokea taarifa kuhusu kutunukiwa shahada hii nilijiuliza, wametumia vigezo gani hadi kufikia uamuzi huu, Waziri wangu wa Mambo ya Nje alinipatia orodha yenye vigezo hivyo nikakubali, nawashukuru sana” alisema Rais Dkt. Samia   Mhe. Rais Samia amesema Tanzania itaendelea kushirikiana na Uturuki katika kufikia malengo yake ya kukuza  uchumi kupitia ushirikiano katika sekta mbalimbali ikiwemo biashara, kilimo, uwekezaji na ushirikiano baina ya watu wa nchi hizi mbili.   Baraza la Chuo Kikuu cha Ankara kwa kauli moja liliamua kumtunukia Mhe. Rais Dkt. Samia Shahada hiyo ya heshima, kwa kutambua Uongozi wake wa kipekee ambao umeleta mageuzi makubwa ya kijamii, kisiasa, na kiuchumi nchini Tanzania. Mageuzi  hayo yameboresha ustawi wa Watanzania; na kuimarisha sifa ya Tanzania ulimwenguni; na yamekuza mahusiano ya kibiashara, kiuchumi na kisiasa kati ya Tanzania na nchi nyingine, ikiwemo Uturuki. Hafla ya kukabidhiwa tuzo hiyo imeongozwa na Prof. Necdet Ünüvar, Mkuu wa Chuo, na kushuhudiwa na Wahadhiri  na wanafunzi wa Chuo hicho pamoja na viongozi mbalimbali kutoka Serikali ya Tanzania na Uturuki akiwemo Waziri wa Mambo ya Nje na Ushirikiano wa Afrika Mashariki, Mhe. January Makamba, Waziri wa Viwanda na Biashara, Mhe. Dkt. Ashatu Kijaji, Waziri wa Uchukuzi, Mhe. Prof. Makame Mbarawa, Waziri wa Elimu na Mafunzo ya Amali Zanzibar, Mhe. Lela Muhammed Mussa.

Shahada hii ni ya pili kwa Mhe. Rais Samia kutunukiwa kutoka ugenini ambapo Shahada ya kwanza ya aina hiyo alitunukiwa na Chuo Kikuu cha Jawaharlal Nehru cha nchini India mwezi Oktoba 2023.

Mkuu wa Chuo Kikuu cha Ankara cha nchini Uturuki,  Prof. Necdet Ünüvar, akimtunuku Rais wa Jamhuri ya Muungano wa Tanzania, Mhe. Dkt. Samia Suluhu Hassan, Shahada ya Heshima ya Udaktari (Honoris Causa) katika Uchumi katika hafla iliyofanyika Chuoni hapo tarehe 18 Aprili 2024 wakati wa ziara ya kitaifa ya Mhe. Rais Samia nchini humo.

Mhe. Rais Dkt. Samia akiwa katika picha ya pamoja na Prof. Ünüvar pamoja na Waziri anayeshughulikia masuala ya Familia na Huduma za Jamii wa Uturuki, Mhe.Mahinur Ozdemir Goktas mara baada ya kutunukiwa Shahada ya Heshima ya Udaktari katika Uchumi na Chuo Kikuu cha Ankara

Mhe. Rais Dkt. Samia akifuwa ukumbini kabla ya kutunukiwa Shahada ya Heshima ya Udaktari katika Uchumi na Chuo Kikuu cha Ankara. Kutoka kulia ni Waziri wa Mambo ya Nje na Ushirikiano wa Afrika Mashariki, Mhe. January Makamba akifuatiwa na Prof.Ünüvar pamoja na Mhe. Waziri Mahinur

Taratibu mbalimbali zikiendelea kabla ya Mhe. Rais Samia kutunukiwa Shahada yake ya Udaktari. Pichani ni viongozi wakiwa wamesimama kwa heshima ya nyimbo za mataifa yao

Mhe. Rais Dkt. Samia akiwa katika picha ya pamoja na Mkuu wa Chuo cha Ankara, Wakufunzi na Viongozi mbalimbali

 

MHE. RAIS SAMIA AWASILI NCHINI UTURUKI KWA ZIARA YA KITAIFA

Rais wa Jamhuri ya Muungano wa Tanzania Mhe. Samia Suluhu Hassan amewasili katika jijini Ankara, Uturuki leo tarehe 17 Aprili 2024 kuanza ziara yake ya kitaifa ya siku nne inayofanyika  kufuatia mwaliko wa Rais wa Jamhuri ya Uturuki, Mhe. Recep Tayyip Erdogan.

 

Mara baada ya kuwasili Mhe. Rais Samia alilakiwa na Waziri anayeshughulikia masuala ya Huduma za Jamii na Familia, Mhe. Mahinur Ozdemir Goktaş.

 

Akiwa nchini Uturuki, Mhe. Rais Samia atapokelewa rasmi na mwenyeji wake Mhe. Rais Erdogan katika Ikulu ya nchi hiyo jijini Ankara tarehe 18 Aprili 2024. Viongozi hao pamoja na mambo mengine watashiriki mazungumzo rasmi na dhifa ya kitaifa iliyoandaliwa na Mhe. Rais Erdogan kwa heshima ya Mhe. Rais Samia.

 

Siku hiyohiyo Mhe. Rais Samia atatunukiwa Shahada ya Heshima ya Udaktari katika Uchumi na Chuo Kikuu cha Ankara kutokana na chuo hicho kutambua uongozi wake wa kipekee ambao umeleta mageuzi makubwa ya kijamii, kisiasa na kiuchumi ambayo yameboresha ustawi wa Wtanzania na kuimarisha sifa ya Tanzania ulimwenguni pamoja na kukuza uhusiano wa kibiashara, kiuchumi na kisiasa kati ya Tanzania na nchi nyingine ikiwemo Uturuki.

 

Mhe. Rais Samia ataondoka Ankara tarehe 19 Aprili 2024 kuelekea Istanbul, mji mkuu wa kibiashara wa Uturuki kwa ajili ya kufungua rasmi  Kongamano la Biashara na Uwekezaji kati ya Tanzania na Uturuki ambalo litahudhuriwa pia na Makamu wa Rais wa Uturuki, Mhe. Cevdet Yılmaz.

Rais wa Jamhuri ya Muungano wa Tanzania, Mhe. Dkt. Samia Suluhu Hassan akisalimiana na Waziri anayeshughulikia masuala ya Familia na Huduma za Jamii wa Uturuki, Mhe.Mahinur Ozdemir Goktas mara baada ya kuwasili nchini Uturuki kwa ajili ya kuanza ziara ya kitaifa itakayofanyika kuanzia tarehe 17 hadi 21 Aprili 2024

Mhe. Rais Samia akisalimiana na Balozi wa Tanzania nchini Uturuki, Mhe. Iddi Bakari mara baada ya kuwasili nchni humo kwa ziara ya kitaifa. Wanaoshuhudia ni pamoja na Waziri wa Mambo ya Nje na Ushirikiano wa Afrika Mashariki, Mhe. January Makamba (wa nne kushoto) pamoja Balozi wa Uturuki nchini Mhe. Dkt. Mehmet Gulluoglu (kulia)

Mhe. Rais Samia Suluhu Hassan akiwa katika mazungumzo na Mhe. Mahinur mara baada ya kuwasili nchini Uturuki kwa ziara ya kitaifa

 

WAZIRI MAKAMBA AKUTANA KWA MAZUNGUMZO NA MWENYEKITI WA UMOJA WA URAFIKI WA WABUNGE WA TANZANIA NA UTURUKI

Waziri wa Mambo ya Nje na Ushirikiano wa Afrika Mashariki, Mhe. January Makamba amekutana kwa mazungumzo na Mbunge wa Bunge la Uturuki na Mwenyekiti wa Umoja wa Urafiki wa Wabunge wa Tanzania na nchi hiyo, Mhe. Zeki Korkutata.

 

Katika mazungumzo yao ambayo yamefanyika tarehe 16 Aprili 2024 jijini Ankara, ikiwa ni sehemu ya kukamilisha maandalizi ya ziara ya Rais wa Jamhuri ya Muungano wa Tanzania, Mhe. Dkt. Samia Suluhu Hassan inayotarajiwa kufanyika nchini humo kuanzia tarehe 17 hadi 21 Aprili 2024 viongozi hao wamejadili maeneo muhimu ya ushirikiano ambayo pia yatajadiliwa kwa uzito wa juu wakati wa ziara hiyo.

 

Mhe. Makamba amesema miongoni mwa masuala muhimu nchi hizi mbili zitayapa kipaumbele kupitia ziara hii, ni  pamoja na kufanyika haraka kwa mkutano wa Tume ya Pamoja ya Ushirikiano kwenye masuala ya Uchumi baina ya Tanzania na Uturuki.

 

Amesema kupitia tume hii nchi hizi mbili zitapata fursa ya kujadili kwa kina sekta za ushirikiano wa kimkakati baina yake na kuandaa mikakati ya utekelezaji wa makubaliano yote yatakayofikiwa wakati wa ziara hii ya kihistoria.

 

Mhe. Makamba amesema kuwa, Uturuki ni nchi muhimu wakati huu  ambapo  Tanzania imejikita katika kukuza uchumi wake kupitia ushirikiano na nchi mbalimbali na kwamba ana imani kwamba Tanzania itanufaika kupitia sekta ambazo nchi hiyo imepiga hatua za kiuchumi na kimaendeleo kama viwanda, usafirishaji, utalii na nishati.

 

Amesema Kngamano la Biashara na Uwekezaji litakalofanyika wakati wa ziara ya Mhe. Rais Samia Suluhu Hassan litakuwa ni chachu ya kuongeza kasi zaidi ya kukuza urari na ujazo wa biashara baina ya nchi hizi mbili.

 

Vile vile amesema wakati wa ziara hiyo hati nane za ushrikiano kwenye sekta za kimkakati ikiwemo Elimu, Uwekezaji na ushirikiano katika masuala ya Sayansi, Teknolojia na Ubunifu  zitasainiwa.

 

Pia alitumia fursa hiyo kumkaribisha Mhe. Korkutata kutembelea Tanzania hususan Bungeni ili kujionea utendaji wa shughuli za Bunge la Jamhuri ya Muungano wa Tanzania.  

Kwa upande wake, Mhe. Korkutata amesema Uturuki inathamini ushirikiano uliopo baina yake na Tanzania na kwamba ziara ya Mhe. Rais Samia ni ishara kuwa nchi hizi mbili zimedhamiria kuupeleka ushirikiano huo katika hatua nyingine ya juu kwa manufaa ya wananchi wa pande hizi mbili.

 

Mhe. Mhe. Makamba yupo nchini Uturuki kwa ajili ya kukamilisha maandalizi ya ziara ya kitaifa ya Mhe. Rais Samia Suluhu Hassan ambapo mbali na kukutana na Mhe. Korkutata pamoja na kutembelea Bunge la Uturuki, Mhe. Makamba pia amekutana kwa mazungumzo na mwenyeji wake, Waziri wa Mambo ya Nje wa nchi hiyo, Mhe. Hakan Fidan.

Waziri wa Mambo ya Nje na Ushirikiano wa Afrika Mashariki, Mhe. January Makamba akizungumza na Mbunge na Mwenyekiti wa Umoja wa Urafiki wa Wabunge wa Tanzania na Uturuki Mhe. Zeki Korkutata (hayupo pichani) ikiwa ni sehemu ya maandalizi ya ziara ya Rais wa Jamhuri ya Muungano wa Tanzania, Mhe. Dkt. Samia Suluhu Hassan nchini humo

Mhe. Korkutata naye akizungumza. Kushoto ni Balozi wa Tanzania nchini Uturuki, Mhe. Iddi Bakari na kulia ni Mkalimani wa Mhe. Korkutata

Mazungumzo yakiendelea

Mazungumzo yakiendelea

Mazungumzo yakiendelea. Wa pili kulia ni Mkurugenzi wa Idara ya Ulaya na Amerika katika Wizara ya Mambo ya Nje na Ushirikiano wa Afrika Mashariki, Balozi Swahiba Mndeme

Mkuu wa Utawala katika Ubalozi wa Tanzania nchini Uturuki, Bw. Mashaka Chikoli (kushoto) pamoja na Afisa Mambo ya Nje, Bi. Clementina Msafiri wakifuatilia mazungumzo.

Mhe. Waziri Makamba akipokea zawadi kutoka kwa Mhe. Korkutata