Tanzania na Malawi kufanya Mkutano wa Nne wa Tume ya Pamoja

Mkuu wa Kitengo cha Mawasiliano ya Serikali na Msemaji wa Wizara ya Mambo ya Nje na Ushirikiano wa Afrika Mashariki, Bi. Mindi Kasiga akizungumza na waandishi wa habari (hawapo pichani) kwenye kikao kilichofanyika katika Ukumbi wa Kimataifa wa Julius Nyerere, tarehe 26 Januari, 2016. Katika kikao hicho Bi. Mindi alizungumza kuhusu  tuzo za ubunifu zilizotolewa na Umoja wa Afrika (AU) kwa Mamlaka ya Usimamizi wa Mifuko ya Hifadhi ya Jamii na Mamlaka ya Mapato Tanzania ambazo zilikuwa miongoni mwa taasisi zilizoshindanishwa na kuibuka  washindi.Pia alitumia fursa hiyo kuwaarifu waandishi wa habari kuhusu Mkutano wa Wakuu wa Nchi wa Umoja wa Afrika unaoendelea nchini Ethiopia-Addis Ababa na Mkutano wa Tume ya pamoja ya ushirikiano kati ya Tanzania na Malawi unaotarajiwa kufanyika tarehe 3 hadi 5 Februari, 2017.

Kutoka kushoto ni Bw. Felix Tinkasimile Meneja wa Mradi wa Mfumo wa Forodha wa TANCIS, kutoka Mamlaka ya Mapato Tanzania (TRA), Bw. Richard Kayombo, Mkurugenzi wa Huduma na Elimu kwa Mlipa Kodi kutoka TRA, Bi. Sarah Kibonde kutoka Mamlaka ya Usimamizi wa Mifuko ya Hifadhi ya Jamii (SSRA) na Bw. David Nghambi kutoka Mamlaka hiyo

Bi. Sarah akizungumza kuhusiana na tuzo iliyotolewa kwa SSRA ambapo alieleza wameshinda Tuzo hiyo katika kipengele cha utunzaji data ambapo wamekuwa wakishirikiana na taasisi za Serikari zinashughulika na umma katika masuala mbalimbali kama Mamlaka ya Vitambulika, Mamlaka ya Mapato na RITA.

Bw. Richard Kayombo akizungumzia tuzo hizo ambapo aliishukuru Wizara ya Mambo ya Nje kwa uratibu  na kutambua umuhimu wa huduma zinazotolewa na Mamlaka ya Mapato kwa umma katika kuboresha utendaji na kuongeza uwazi na uwajibikaji.

Sehemu ya waandishi wa habari wakifuatilia mkutano.

Bi Mindi  akimkabidhi Bi. Sarah kombe la ushindi kwa niaba ya Wizara. Bi. Kibonde aliipokea zawadi hiyo kwa niaba ya Mamlaka ya Usimamizi wa Mifuko ya Hifadhi ya Jamii.

Meneja wa Mradi wa Mfumo wa Forodha wa TANCIS kutoka TRA akipokea zawadi ya cheti cha ushindi kutoka kwa Bi. Mindi Kasiga.

Picha ya pamoja ya Watumishi wa Wizara ya Mambo ya Nje, TRA na SSRA.

Mkutano ukiendelea.
 ==================================================

TAARIFA KWA VYOMBO VYA HABARI 

Taarifa kuhusu Mkutano wa Tume ya Pamoja ya Ushirikiano kati ya Tanzania na Malawi, Tuzo za AU kwa SSRA na TRA na Mkutano wa AU-Addis Ababa

Mkutano wa Nne wa Tume ya Pamoja ya Kudumu ya Ushirikiano (JPCC) kati ya Tanzania na Malawi umepangwa kufanyika mjini Lilongwe, Malawi tarehe 03 hadi 05 Febuari 2017. Mkutano huo utawakutanisha viongozi na wataalamu wa sekta mbalimbali kutoka Tanzania na Malawi.

Waziri wa Mambo ya Nje na Ushirikiano wa Afrika Mashariki, Mhe. Balozi Dkt. Augustine P. Mahiga (Mb),   anategemewa kuongoza ujumbe wa Tanzania katika mkutano huo. Aidha, Uongozi wa Mkoa wa Mbeya  ambao umekuwa ukishiriki katika vikao vya maandalizi, unategemewa kushiriki katika mkutano huo.

Lengo la mkutano huu ni kujadili na kutathmini hatua zilizofikiwa katika utekelezwaji wa makubaliano yaliyofikiwa katika Mkutano wa Tatu wa JPCC uliofanyika Tanzania, tarehe 24 hadi 30 Juni, 2003.

Miongoni mwa mafanikio yaliyofikiwa kwenye utekelezaji wa makubaliano ya mikutano iliyopita kwa upande wa Tanzania ni pamoja na; Kuanzishwa kwa mradi wa Kituo cha Huduma za Pamoja Mipakani (One Stop Border Post – OSBP)  katika mpaka wa Kasumulu/Songwe ambao umefikia katika hatua nzuri; Idara za Uhamiaji, Polisi na Forodha za nchi zetu mbili zinaendelea kushirikiana katika kutoa huduma na kudhibiti abiria na mizigo katika maeneo ya mpakani.

Pia, Mamlaka ya Bandari Tanzania imeruhusu Mamlaka za Malawi kuwa na maeneo yao katika bandari zetu, kwa ajili ya kuhifadhia mizigo na bidhaa nyingine zinazopitia nchini kabla ya kwenda Malawi. 

Aidha, mkutano huo utatoa fursa kwa nchi zetu mbili kujadiliana na kukubaliana kuhusu maeneo  mapya ya ushirikiano. Miongoni mwa maeneo hayo (kwa upande wa Tanzania) ni pamoja na: Kuanzisha ushirikiano katika sekta ya usafiri wa majini, ambapo mbali na faida za kiuchumi, safari hizo zitaimarisha mwingiliano  wa watu na kupunguza tofauti zilizopo. Kwa hivi sasa Serikali inajenga meli tatu, mbili kwa ajili ya kusafirisha mizigo na moja kwa ajili ya abiria. 

Maeneo mengine ni kuanzisha Mkataba wa ushirikiano katika Sekta ya Usafiri wa Anga (BASA); Kuanzisha mfumo wa kurahisisha ufanyaji biashara kwa ajili ya kuwasaidia wafanyabiashara wadogo hasa katika maeneo ya mpakani; Kuanzisha ushirikiano katika uhifadhi wa mazingira na masuala ya afya ikiwemo magonjwa ya mlipuko hususan maeneo ya mipakani; na Kuanzisha ushirikiano katika sekta ya elimu ya vyuo vikuu na vyuo vingine vya amali.

Tangu kuanzishwa kwa Tume ya Pamoja ya Kudumu ya Ushirikiano (JPCC) kati ya Tanzania na Malawi nchi hizi mbili zimeshafanya vikao vinne vya Tume hiyo. Kikao cha mwisho kilifanyika hapa Dar es Salaam, Tanzania tarehe 24 hadi 30 Juni, 2003 na kuhudhuriwa na viongozi na wataalam wa sekta mbalimbali kutoka nchi zetu mbili.

Wakati huohuo, Mkuu wa Kitengo cha Mawasiliano na Msemaji wa Wizara ya Mambo ya Nje na Ushirikiano wa Afrika Mashariki, Bi. Mindi Kasiga kwa niaba ya Wizara  amekabidhi tuzo kwa wawakilishi wa taasisi za Mamlaka ya Usimamizi wa Mifuko ya Hifadhi ya Jamii (SSRA), Bi. Sarah Kibonde na Mamlaka ya Mapato Tanzania (TRA), Bw. Richard Kayombo baada ya kuibuka washindi wa Tuzo zilizotolewa na Umoja wa Afrika (AU). 

Akipokea kombe baada ya  kuibuka mshindi  kwenye kipengele B kuhusu “Innovative Partnership in Service Delivery for its National Social Security Collaborative Database Bridging Project" Bi. Kibonde alisema kuwa ushindi huo ni chachu ya taasisi yao kufanya vizuri zaidi katika kutoa huduma bora kwa wananchi wote kwa ujumla. 

Naye Mkurugenzi wa Huduma na Elimu kwa Mlipa Kodi, Bw. Kayombo ambaye taasisi yake imefanikiwa kushika nafasi ya pili kipengele C kuhusu "Tanzania customs Integrated System" ameushukuru Umoja wa Afrika kwa kuandaa mashindano hayo ambayo ni muhimu katika kujenga uwazi kwenye eneo la ulipaji kodi. 

Pia  ameushukuru Ubalozi wa Tanzania kwa kupokea Tuzo hizo kwa niaba yao na kuishukuru Wizara ya Mambo ya Nje na Ushirkiano wa Afrika Mashariki kwa kukabidhi ushindi huo kwao.

Katika hatua nyingine, Bi. Kasiga alizungumzia juu ya Mkutano wa Wakuu wa Nchi wa Umoja wa Afrika (AU Summit) unaotarajiwa kufanyika Jijini Addis Ababa, Ethiopia tarehe 30 na 31 Januari, 2017. Mkutano huo umetanguliwa na kikao cha Kamati ya Wawakilishi wa Kudumu na Maafisa Waandamizi kilichofanyika tarehe 22 hadi 24 Januari, 2017 na kufuatiwa na kikao cha Baraza la Mawaziri kilichoanza tarehe 25 hadi 27 Januari, 2017.

-Mwisho-

Imetolewa na:

Kitengo cha Mawasiliano ya Serikali,

Wizara ya Mambo ya Nje na Ushirikiano wa Afrika Mashariki,

Dar es Salaam, 26 Januari, 2017

Rais Erdogan aondoka nchini baada kumaliza ziara yake

Waziri Mkuu wa Jamhuri ya Muungano wa Tanzania Mhe. Kassim Majaliwa akimsindikiza Rais wa Jumhuri ya Uturuki Mhe. Recep Tyyip Erdogan wakati akielekea kupanda ndege, kuondoka nchini mara baada ya kuhitimisha ziara yake ya siku mbili katika Uwanja wa Ndege wa Kimataifa wa Julius Nyerere 

Waziri wa Mambo ya Nje na Ushirikiano wa Afrika Mashariki Mhe. Balozi Dkt. Augustine Mahiga na Rais wa Uturuki Mhe. Recep Tyyip Erdogan wakipena mikono wakati wa hafla fupi ya kumuaga Rais huyo iliyofanyika Uwanja wa Ndege wa Kimataifa wa Julius Nyerere Jijini Dar es Salaam

Rais Mhe. Erdogan na Mke wake wakipungia mikono wananchi waliojitokeza kumuaga Uwanja wa Ndege wa Kimataifa wa Julius Nyerere Jijini Dar es Salaam

Waziri Mkuu Mhe. Kassim Majaliwa akiwa na Waziri Mhe. Augustine Mahiga wakati wa kumuaga Rais Erdoga Uwanja wa Ndege wa Kimataifa wa Julius Nyerere Jijini Dar es Salaam

Rais Magufuli ampokea Rais wa Uturuki Ikulu

Rais wa Jamhuri ya Muungano wa Tanzania Mhe.Dkt John Pombe Magufuli  na mgeni wake Rais wa Jamhuri ya Uturuki Mhe. Recep Tyyip Erdogan wakiwasalimia wananchi walijiotokeza kwenye hafla ya kumkaribisha katika viwanja vya Ikulu Jijini Dar es Salaam

Rais wa Jamhuri ya Uturuki Mhe. Recep Tyyip Erdogan akikabidhiwa ua na mtoto, Amara Asenath Tarimo wakati wa hafla ya kumkaribisha Rais huyo iliyofanyika Ikulu Jijini Dar es Salaam

Rais Mhe. Dkt Magufuli na Rais wa Jamhuri ya Uturuki Mhe. Erdogan wakiwa wamesimama wakati wimbo wataifa ukipigwa

Rais Mhe.Erdogan akikagua gwaride mara baada ya kuwasili Ikulu Jijini Dar es Salaam

Rais Mhe. Erdogan akipiga moja ya ngoma zilikuwepo wakati wa hafla ya mapokezi ya kumkaribisha Ikulu Jijini Dar es Salaam

Waziri wa Mambo ya Nje na Ushirikiano wa Afrika Mashariki, Mhe. Balozi Dkt. Augustine Mahiga na Katibu Mkuu Kiongozi, Balozi Eng. John Kijazi wakifuatilia mazungumzo yaliyokuwa yakindelea 

Rais Mhe. Dkt. John Pombe Magufuli akizungumza na hadhira waliojitokeza kwenye ukumbi wa Mikutano Ikulu Jijini Dar es Salaam

TAARIFA KWA VYOMBO VYA HABARI

TAARIFA KWA VYOMBO VYA HABARI

Ziara ya Rais wa Uturuki nchini Tanzania

Rais wa Jamhuri ya Muungano wa Tanzania, Mhe. Dkt. John Pombe Magufuli amemshukuru Rais wa Jamhuri ya Uturuki, Mhe. Recep Tayip Erdogan kwa kuichagua Tanzania kuwa nchi ya kwanza kuitembelea katika mpango wake wa kuzitembelea nchi za Afrika. Kauli hiyo imetolewa leo na Mhe. Rais Magufuli Ikulu jijini Dar es Salaam alipokuwa anaongea na waandishi wa habari pamoja na mgeni wake huyo.

Rais Magufuli alimuhakikishia, Rais Erdogan kuwa Tanzania ipo tayari kushirikiana na Uturuki na ana matumaini kuwa kufunguliwa kwa Ubalozi wa Tanzania nchini humo kutakuza mahusiano zaidi ya kibiashara ambapo kwa takwimu zilizopo zinaonesha kuwa biashara kati ya nchi hizi mbili imekua kutoka Dola za Marekani milioni 66 mwaka 2011 na kufikia Dola milioni 190 mwaka 2016.

Aidha, Rais alielezea matumaini yake kuwa ziara ya Rais Erdogan nchini, itaongeza uwekezaji kutoka Uturuki ambapo kwa sasa takribani makampuni 30 yenye thamani ya Dola za Marekani milioni 305 ambayo yameajiri watu 2,959 yapo nchini.

Rais Magufuli na Mgeni wake walishuhudia uwekaji saini wa Mikataba 9 ya ushirikiano kati ya nchi hizo mbili katika maeneo mbalimbali kama vile, viwanda, utalii, usafiri wa anga, utangazaji, elimu, utafiti, ulinzi na afya. Uwekaji saini wa mikataba hiyo utaimarisha ushirikiano na utasaidia pia kufikia azma ya Serikali ya kuifanya kuwa nchi ya viwanda kutokana na teknolojia kubwa iliyofikiwa na Uturuki.

Rais Magufuli alieleza kuwa mojawapo ya kampuni zilizoomba zabuni ya kujenga reli ya kati ni kampuni kutoka Uturuki hivyo, amemuomba Rais Erdogan kuwa endapo kampuni hiyo itashinda zabuni, Benki ya Exim ya Uturuki  itoe mkopo kwa ajili ya ujenzi wa sehemu ya reli hiyo ambayo ina urefu wa zaidi ya kilomita 400.

Kwa upande wake, Rais wa Uturuki aliahidi kushirikiana na Tanzania kukuza uwekezaji na biashara ambapo alisisitiza umuhimu wa kukuza kiwango cha biashara angalau kifikie Dola milioni 500 kwa mwaka.

Aidha, Rais Erdogan alielezea tukio la jaribio la mapinduzi dhidi ya Serikali yake lililofanywa na kikundi cha Fethulla tarehe 15 Julai 2016 ambalo lilisababisha vifo vya watu 240 na maelfu ya majeruhi nchini humo. Alisema wafuasi wa kikundi hicho kilichopanga jaribio hilo wamesambaa hadi katika nchi za Afrika, hivyo, aliomba viongozi wa nchi za Afrika kushirikiana naye katika kukabiliana nao  ili kujihakikishia amani kwa ajili ya maendeleo ya kiuchumi.

Rais wa Uturuki alihitimisha mazungumzo yake kwa kumuomba Rais Magufuli azuru nchini Uturuki wakati wa ufunguzi wa Ofisi ya Ubalozi wa Tanzania nchini humo ambapo Mhe. Prof. Elizabeth Kiondo ameteuliwa kuwa Balozi wa kwanza. 

Imetolewa na:

Kitengo cha Mawasiliano ya Serikali,

Wizara ya Mambo ya Nje na Ushirikiano wa Afrika Mashariki

Dar es Salaam, 23 Januari 2017.

Rais wa Jamhuri ya Uturuki awasili nchini

Rais wa Jamhuri ya Uturuki, Mhe. Recep Tayyip Erdogan akiwa ameambana na mkewe Mama Emine Erdogan, wakiwasili katika uwanja wa ndege wa kimataifa wa Julius Nyerere Jijini Dar es Salaam. Mhe. Rais Erdogan atakuwa nchini kwa ziara ya siku mbili kuanzia leo tarehe 22 Januari, 2017. 

Waziri Mkuu, Mhe. Kassim Majaliwa Majaliwa akimkaribisha Mhe. Rais Erdogan mara baada ya kuwasili katika uwanja wa ndege wa Kimataifa wa Julius Nyerere.

Waziri wa Mambo ya Nje na Ushirikiano wa Afrika Mashariki, Mhe. Balozi Dkt. Augustine Mahiga (Mb) akisalimiana na Mhe. Rais Erdogan mara baada ya kuwasili katika uwanja wa ndege wa kimataifa wa Julius Nyerere.

Katibu Mkuu wa Wizara ya Mambo ya Nje na Ushirikiano  wa Afrika Mashariki, Balozi Dkt. Aziz P. Mlima akisalimiana na Mhe. Rais Erdogan mara baada ya kuwasili katika uwanja wa ndege wa kimataifa wa Julius Nyerere, pembeni ni Kaimu Mkuu wa Mkoa wa Dar es Salaam Mhe. Ali Salum Hapi.

Mkurugenzi wa Idara ya Ulaya na Amerika katika Wizara ya Mambo ya Nje na Ushirikiano wa Afrika Mashariki, Balozi Joseph Sokoine akisalimiana na Mhe. Rais Erdogan mara baada ya kuwasili katika Uwanja wa ndege wa kimataifa Julius Nyerere.

Mhe. Rais Erdogan akisalimia sehemu ya vikundi vya ngoma vilivyokuwa vikitumbuiza uwanjani hapo wakati alipowasili.

Wakiendelea kutumbuiza.

Waziri Mahiga afanya mazungumzo na Waziri wa Maendeleo wa Denmark

Waziri wa Mambo ya Nje na Ushirikiano wa Afrika Mashariki  Mhe. Balozi Dkt. Augustine Mahiga akisalimiana na Waziri wa maendeleo wa Denmark Mhe. Martin Bille Hermann  walipokutana kwa mazungumzo Wizarani Jijini Dar es Salaam. Katika mazungumzo yao walijikita katika maeneo mbalimbali ya kuendeleza  ushirikiano katika maeneo ya afya, elimu na uwekezaji. 

Waziri Mhe.Balozi Dkt. Augustine Mahiga akimsikiliza Waziri wa Maendeleo wa Denmark Mhe. Hermann, Wapili kulia ni Mkurugenzi wa Idara ya Ulaya na Amerika Balozi Joseph Sokoine na Afisa kutoka Wizarani Bi. Tunsume Mwangolombe

Mazungumzo yakiendelea

Waziri Mhe. Mahiga na Waziri wa Maendeleo wa Denmark Mhe.Hermann wakijadili jambo

Mhe. Rais Magufuli awaapisha mabalozi sita

Rais wa Jamhuri ya Muungano wa Tanzania Mhe. Dkt. John Pombe Joseph Magufuli akimwapisha Dkt. Emmanuel Nchimbi kuwa Balozi wa Tanzania nchini Brazili, Ikulu jijini Dar esa salaam leo January 20, 2017.

Rais wa Jamhuri ya Muungano wa Tanzania Mhe. Dkt. John Pombe Magufuli akimwapisha Dkt. James Msekela kuwa Balozi wa Tanzania Geneva - Umoja wa Mataifa, Ikulu jijini Dar esa salaam leo January 20, 2017.

Rais wa Jamhuri ya Muungano wa Tanzania Mhe. Dkt. John Pombe Magufuli akimwapisha Mhe. Mbelwa Kairuki kuwa Balozi wa Tanzania nchini China, Ikulu jijini Dar esa salaam leo January 20, 2017.

Rais wa Jamhuri ya Muungano wa Tanzania Mhe. Dkt. John Pombe Magufuli akimwapisha Mhe. George Madafa kuwa Balozi wa Tanzania nchini Italia, Ikulu jijini Dar esa salaam leo January 20, 2017.

Rais wa Jamhuri ya Muungano wa Tanzania Mhe. Dkt. John Pombe Magufuli akimwapisha Profesa Elizaberth Kiondo kuwa Balozi wa Tanzania nchini Uturuki, Ikulu jijini Dar esa salaam leo January 20, 2017.

Rais wa Jamhuri ya Muungano wa Tanzania Mhe. Dkt. John Pombe Magufuli akimwapisha Bi. Fatma Rajab kuwa Balozi wa Tanzania nchini Qatar, Ikulu jijini Dar esa salaam leo January 20, 2017.

Sehemu ya Viongozi waliohudhuria hafla hiyo, ikulu jijini Dar es Salaam

Waheshimiwa Mabalozi wakila Kiapo cha maadili Mbele ya Rais wa Jamhuri wa Muungano wa Tanzania Mhe. Dkt. John Pombe Magufuli (hayupo pichani), Makamu wa Rais wa Jamhuri ya Muungano wa Tanzania Mhe. Samia Hassani Suluhu, Waziri wa Mambo ya Nje na Ushirikiano wa Afrika Mashariki Dkt. Augustine Mahiga na Waziri wa Nchi Ofisi ya Rais, Menejimenti ya Utumishi wa Umma na Utawala Bora Mhe. Angella Jasmine Kairuki pamoja na viongozi mbalimbali walihudhuria hafla hiyo.

Rais wa Jamhuri ya Muungano wa Tanzania Mhe. Dkt. John Pombe Magufuli (wa tano kutoka Kushoto), Makamu wa rais wa Jamhuri ya muungano wa Tanzania Mhe. Samia Hassani Suluhu (wa nne kutoka kushoto), Waziri wa mambo ya Nje na Ushirikiano wa Afrika Mashariki Mhe.Dkt. Augustine Mahiga (wa tano kutoka kulia) na Katibu Mkuu wa Wizara ya Mambo ya Nje na Ushirikiano wa Afrika Mashariki Balozi Dkt. Aziz P. Mlima (wanne kutoka kulia) wakiwa katika picha ya pamoja na Mabalozi wateule mara baada ya kuapishwa, Ikulu jijini Dar es Salaam.