BALOZI KOMBO AKIPONGEZA KITUO CHA DKT SALIM AHMED SALIM KWA KUTOA MAFUNZO YA STADI ZA UONGOZI NA MAJADILIANO

Waziri wa Mambo ya Nje na Ushirikiano wa Afrika Mashariki, Mhe. Balozi Mahmoud Thabit Kombo (Mb.) amekipongeza Kituo cha Uhusiano wa Kimataifa cha Dkt. Salim Ahmed Salim (CFR) kwa kutoa mafunzo yenye lengo la kuwanoa vijana katika masuala ya uongozi hususan kwenye stadi za Uongozi na Majadiliano. 

 

Mhe. Balozi Kombo ametoa pongezi hizo leo Agosti 22, 2025 alipokitembelea Kituo hicho ambacho ni moja ya Taasisi zilizo chini ya Wizara kwa lengo la kujitambulisha, kufahamu majukumu yake pamoja na kuangalia maendeleo ya mradi wa jengo la vyumba vya mihadhara.

Akizungumza na wanafunzi kutoka Taasisi za Umma na Sekta binafsi wanaoshiriki mafunzo ya muda mfupi kuhusu stadi za Uongozi na Majadiliano chuoni hapo, Mhe. Waziri Kombo amewataka kuzingatia mafunzo hayo ambayo yatawajenga katika masuala ya uongozi, uzalendo na majadiliano, fani ambazo ni muhimu katika ulimwengu wa sasa wa kutumia diplomasia na uhusiano na mataifa mbalimbali kunufaika kiuchumi.

Amesema washiriki hao wana bahati kubwa kupatiwa mafunzo katika Kituo cha Uhusiano wa Kimataifa cha Dkt. Salim Ahmed Salim ambacho pia baadhi ya wakufunzi wake ni Mabalozi na Wanadiplomasia wabobevu  kwenye masuala ya uhusiano wa kimataifa na Diplomasia kwa ujumla.

“Kwenu ninyi washiriki wa mafunzo haya mna bahati kubwa ya kufundishwa na wanadiplomasia nguli akiwemo Balozi Modest Mero ambaye ni miongoni mwa wanadiplomasia waliowahi kuhudumu kwa nafasi ya kuiwakilisha nchi yetu katika Umoja wa Mataifa nchini Marekani. Hivyo, Balozi Mero kwa wasifu wake ni fursa kubwa kwenu washiriki kupokea elimu ya masuala ya stadi za uongozi na majadiliano”, amesema Mhe. Kombo.

Wakati wa ziara hii Mhe.Kombo amekutana na kufanya mazungumzo na Mwenyekiti wa Baraza la Uongozi wa Kituo hicho, Mhe. Balozi Ramadhan Muombwa Mwinyi, Kaimu Mkurugenzi wa Kituo hicho, Dkt. Felix Wandwe ndc, baadhi ya Wajumbe wa Menejimenti ya Kituo hicho na Viongozi kutoka Wizara ya Mambo ya Nje na Uhusiano wa Afrika Mashariki.

 

WAZIRI KOMBO AAGANA NA BALOZI WA UFARANSA NA USWIS HAPA NCHINI.

Waziri wa Mambo ya Nje ma Ushirikiano wa Afrika Mashariki, Mhe. Balozi Mahmoud Thabit Kombo (Mb.) ameagana na aliyekuwa Balozi wa Ufaransa Mhe. Nabil Hajlaoui na Balozi wa Uswisi Mhe. Didier Chassot ambao wamemaliza muda wao wa uwakilishi hapa nchini.

Katika mazungumzo yao yaliyofanyika kwa nyakati tofauti katika Ofisi ndogo za Wizara jijini Dar es Salaam Mhe. Balozi Kombo amempongeza Mhe. Nabil Hajlaoui kwa kazi kubwa na nzuri aliyoifanya katika kipindi chake cha uwakilishi hapa nchini.

“Mhe. Balozi Hajlaoui nakupongeza sana kwa kazi kubwa, nzuri na ya mfano, uliyoifanya hapa nchini, hasa katika eneo la kukuza na kuimarisha uhusiano wa kidiplomasia na ushirikiano kati ya Tanzania na Ufaransa, kwakweli hongera sana na nikutakile kila la heri huko uendako,” alisema Balozi.

Naye Mhe. Balozi Hajlaoui ameshukuru kwa ushirikiano alioupata wakati wote alipokuwa nchini na hivyo kumuwezesha kutekeleza majukumu yake kwa tija na ufanisi bila ya kikwazo chochote na kuahidi kuwa atakuwa balozi mzuri wa Tanzania huko aendako.

Katika tukio lingine akiagana na Balozi wa Uswisi anayemaliza muda wake nchini Mhe. Didier Chassot Balozi Kombo amemshukuru na kumpongeza kwa kushiriki kikamilifu katika kuimarisha ushirikiano kati ya Tanzania na Uswisi katika kipindi chake cha uwakilishi.

Amemuahidi kuwa Serikali kupitia Wizara ya Mambo ya Nje na Ushirikiano wa Afrika Mashariki itaendelea kutoa ushirikiano kwa ajaye na kuendelea na kukamilisha masuala mbalimbali ya ushirikiano aliyoyaanzisha.

Naye Mhe. Chassot ameishukuru Wizara kwa ushirikiano mzuri iliyompatia wakati wote wa uwakilishi wake hapa nchini na kuahidi kuwa atayaendelea mazuri yote alyojifunza alipokuwepo hapa nchini.

 

WAZIRI KOMBO APOKEA MWALIKO WA RAIS SAMIA KUSHIRIKI JUKWAA LA FOCAC

Waziri wa Mambo ya Nje na Ushirikiano wa Afrika Mashariki Mhe. Balozi Mahmoud Thabit Kombo amepokea mwaliko rasmi wa Rais wa Jamhuri ya Muungano wa Tanzania Mhe. Dkt. Samia Suluhu Hassan, kushiriki Mkutano wa Kileke wa Wakuu wa Nchi na Serikali wa Jukwaa la Ushirikiano kati ya China na Afrika (FOCAC) kutoka kwa Rais wa Jamhuri ya Watu wa China Mhe. Xi Jinping utakaofanyika mwezi Septemba 2024 jijini Beijing nchini China. 

Mwaliko huo umewasilishwa na Balozi wa Jamhuri ya Watu China nchini Tanzania Mhe. Chen Mingjian katika Ofisi ndogo za Wizara jijini Dar es Salaam, pia umeainisha  nafasi ya kipekee kwa Mhe. Dkt. Samia Suluhu Hassan kuzungumza katika kikao cha ufunguzi kwa niaba ya nchi za Ukanda wa Afrika Mashariki pamoja na kuzungumza Katika Mkutano wa Ngazi ya Juu utakaojadili mada ya Maendeleo ya Viwanda na Kilimo cha Kisasa.

Akipokea mwaliko huo kwa niaba ya Mhe. Rais, Mhe. Balozi Kombo ameelezea kuwa nafasi ya Mhe. Rais kushiriki na kuzungumza katika Jukwaa hilo itaipa nchi fursa ya kuangazia uhusiano na ushirikiano uliopo kati ya Tanzania na China na Jumuiya ya Afrika Mashariki kwa ujumla,  hali ambayo itasaidia vipaumbele vya maendeleo vya Tanzania na Jumuiya ya Afrika Mashariki ambapo Tanzania ni kinara na kiongozi wa kupigiwa mfano kwenye Jumuiya hiyo kongwe Afrika.

Aidha Balozi Kombo amemhakikishia Balozi Chen ushiriki wa Tanzania katika Mkutano wa Kileke wa Wakuu wa Nchi na Serikali wa FOCAC ambapo Tamko la FOCAC na Mpango Kazi wa FOCAC itakuwa ni moja ya Matokeo ya Mkutano huo. 

Naye Balozi wa China Mhe. Chen ameelezea kufurahishwa kwa China kutokana na kupokelewa kwa mwaliko wa kuhudhuria Mkutano na kuongeza kuwa kitendo hicho kinaendelea kukuza na kuimarisha uhusiano wa kidiplomasia na wa kihistoria uliopo kati ya Tanzania na China.

Amesema China inaona Tanzania kama mshirika muhimu wa maendeleo kwa nchi za Afrika Mashariki na Afrika kwa ujumla na kuahidi kuwa China itaendelea kushirikiana na Tanzania. 

Jukwaa la Focac lilianzishwa kwa lengo la kukuza ushirikiano kati ya China na Afrika ili kuchagiza maendeleo kupitia sekta mbalimbali za kijamii na kiuchumi. 

FOCAC limekuwa jukwaa linalotoa fursa sawa kwa pande zote mbili kujadili masuala muhimu ya kimaendeleo na kutafuta majibu ya changamoto mbalimbali zinazoikabili dunia ikiwemo amani na usalama na mabadiliko ya tabia nchi.

RAIS MNANGAGWA AKABIDHI ENEO LA UJENZI WA MAKUMBUSHO YA UKOMBOZI WA AFRIKA

Rais wa Jamhuri ya Zimbabwe, Mhe. Dkt. Emmerson Mnangagwa amezindua ujenzi wa Makumbusho ya Urithi wa Afrika na kukabidhi eneo la hekta moja (1) kwa ajili ya uhifadhi wa historia ya ukombozi wa nchi za Kusini mwa Afrika linalotambulika kama Kituo cha Ukombozi wa Nchi za SADC au “SADC Liberation Square” 

Mhe. Mnangagwa alikabidhi Kituo hicho rasmi kwa Mhe. Dkt. Samia Suluhu Hassan, Rais wa Jamhuri ya Muungano wa Tanzania na Mwenyekiti wa Asasi ya Siasa, Ulinzi na Usalama ya SADC, ambapo kilipokelewa kwa niaba na Katibu Mtendaji wa Jumuiya ya Maendeleo Kusini mwa Afrika (SADC) Mhe. Elias Magosi na kueleza kuwa Kituo hiko kitachangia juhudi za Kanda za kuenzi michango ya Wapigania uhuru katika harakati za ukombozi na pia ni miongoni mwa utekelezaji wa mkakati wa kuenzi Waanzilishi wa SADC.

Kwa upande wake, Mhe. Mnangagwa alikiri kuwa Kituo cha Ukombozi wa Nchi za SADC kitachangia uhifadhi wa historia muhimu za ukombozi ambazo zinaendelea kuandaliwa chini ya mpango wa kujenga Makumbusho ya SADC jijini Gaborone na ule wa kujenga Makumbusho ya Urithi wa Afrika nchini Tanzania. Hali kadhalika, Mhe. Mnangagwa alizialika nchi wanachama za SADC kuchangia katika kuboresha Kituo hicho kwa kuwasilisha zana za Sanaa kutoka nchini mwao zinazoelezea historia ya ukombozi wa nchi za kusini mwa Afrika.

Makabidhiano ya eneo hilo yameenda sambamba na ziara ya kutembelea eneo la mradi pamoja na zoezi la kupanda mti ambao ulipandwa na Katibu Mtendaji wa SADC, Bw. Magosi na kushuhudiwa na Wakuu wa Nchi na Serikali walioshiriki ziara hiyo akiwemo, Mhe. João Lourenço, Rais wa Jamhuri ya Angola, Mtukufu Mswati III, Mfalme wa Eswatini, Mhe. Andry Rajoelina, Rais wa Jamhuri ya Madagascar, na Mhe. Mokgweetsi Masisi, Rais wa Jamhuri ya Botswana.

Ziara hiyo ilikuwa ni muendelezo wa ratiba ya Mkutano wa 44 wa Wakuu wa Nchi na Serikali uliofanyika tarehe 17 Agosti 2024. Akihutubia katika hafla ya makabidhiano ya eneo hilo, Mhe. Mnangagwa ameeleza kuwa mradi huo unalenga kuwaenzi wanaharakati wa kweli na wana wa Afrika waliojitoa muhanga katika kupigania ukombozi wa nchi zao. Hivyo, ni heshima kubwa kwa mataifa yetu kutambua mchango wao na kuona fahari kuienzi historia yetu.

Aidha, Wakuu hao wa nchi na Serikali walitembelea pia Kituo cha uchakataji taka cha Geo Pomona cha jijini Harare ambacho awali kilikuwa dampo na baadae  kuanza kuchakata taka kwa ajili ya kuzalisha nishati ya umeme sambamba na kutoa ajira mbalimbali kupitia shughuli za kituo hicho.

Mradi huo una uwezo wa kukusanya taka ngumu zenye uzito wa tani 1000 na kuzaliwa kiasi cha Megawati 16 hadi 22 za umeme kwa ajili ya kuunganisha kwenye gridi ya Taifa kwa matumizi ya umma wa Zimbabwe.

Akihutubia katika uzinduzi huo, Mhe. Mnangagwa ameeleza kuwa eneo hilo awali lilikuwa limekithiri kwa uchafu na wingi wa taka na hivyo kupatikana kwa teknolojia bora na ya kisasa ya kuchakata taka imesaidia kutunza mazingira kwa kuteketeza taka hatarishi pasipo kuleta madhara ya kiafya kwa bianadamu, mimea, wanyama na mazingira kwa ujumla.

“Zimbabwe imeweka ahadi ya kukiendeleza na kukisimamia kituo hiki ili kiwe cha mfano katika kuitengeneza kanda ya kijani kwa kutunza mazingira na kuzalisha umeme” alisema Mhe. Mnangagwa.

Aidha, alieleza kuwa miradi kama hii ni sehemu ya jitihada za ubunifu unaohitajika ili kuiletea Jumuiya ya SADC maendeleo na akasisitiza ni vyema kuendelea kuwa wabunifu katika kila sekta kwa kuwa ni wazi kuwa kila nchi itajengwa na wenye nchi na sio kinyume chake.

====================================

Habari katika picha; Matukio yaliyojiri wakati wa uzinduzi wa eneo la Makumbusho ya Ukombozi wa Afrika

Sehemu ya Wakuu wa Nchi na Serikali wa SADC walioshiriki katika ziara ya kutembelea eneo la mradi wa Makumbusho ya Ukombozi wa Afrika na Kituo cha kuchakata taka vilivyopo Harare, Zimbabwe tarehe 8 Agosti, 2024.

Rais wa Jamhuri ya Zimbabwe, Mhe. Emmerson Mnangagwa akihutubia katika ziara ya ujumbe wa SADC kwenye kituo cha kuchakata taka tarehe 8 Agosti, 2024 Harare, Zimbabwe

Mhe. Mnangagwa akimkabidhi Katibu Mtendaji wa SADC, Mhe. Elias Magosi eneo la ujenzi wa Makumbusho ya Ukombozi wa Afrika ambaye alipokea kwa niaba ya Mhe. Samia Suluhu Hassan, Rais wa Jamhuri ya Muungano wa Tanzania na Mwenyekiti wa Asasi ya Siasa, Ulinzi na Usalama ya SADC.

Mhe. Magosi akipanda mti katika eneo la mradi wa Makumbusho ya Ukombozi wa Afrika.

Mratibu wa Masuala ya SADC kitaifa kutoka Wizara ya Mambo ya Nje na Ushirikiano wa Afrika Mashariki, Bi. Talha Waziri akimwagilia mti uliopandwa katika eneo hilo la mradi unaoashirikia "umoja na mshikamano katika kanda" wakati wa hafla ya uzinduzi wa eneo hilo.


Matukio mengine yaliyojiri katika kituo cha kuchakata taka

TANZANIA YAKABIDHIWA UENYEKITI WA SADC ORGAN TROIKA

 

Mkutano wa Kawaida wa 44 wa Wakuu wa Nchi na Serikali wa Jumuiya ya Maendeleo Kusini mwa Afrika (SADC) leo tarehe 17 Agosti, 2024 umekabidhi jukumu la Unyekiti wa Asasi ya Ushirikiano wa Siasa, Ulinzi na Usalama ya Jumuiya ya Maendeleo Kusini mwa Afrika (SADC Organ on Politics, Defence and Security) kwa Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Asasi hiyo ina jukumu la kusimamia masuala ya ulinzi na usalama katika kanda ya SADC na ina mamlaka ya kuongoza na kutoa ushauri kwa nchi wanachama katika masuala yanayohatarisha amani, usalama na utulivu katika kanda hiyo. Majukumu hayo huratibiwa katika ngazi ya Wakuu wa Nchi na Serikali wa Asasi hiyo.

Nafasi za uongozi kwa upande wa SADC Organ hufuata mzunguko kama ilivyo katika nafasi ya uongozi wa SADC lakini sio nchi zote zinaweza kuwa Mwenyekiti isipokuwa kwa kigezo cha uwepo wa hali ya ulinzi na usalama katika nchi mwanachama. Tanzania imeshawahi kuwa Mwenyekiti mara tatu katika vipindi tofauti: 2006/2007, 2012/2013 na 2016/2017 na sasa itaongoza kwa kipindi cha 2024/2025 ambapo itakuwa mwenyeji wa vikao vya Asasi hiyo kwa kipindi husika.

Kufuatia utaratibu huo, Troika ya SADC kwa mwaka 2024/2025 inaundwa na Zambia (Mwenyekiti aliyemaliza muda) Tanzania (Mwenyekiti wa sasa) na Malawi (Makamu Mwenyekiti).

Jukumu kubwa linalomkabili Mhe. Rais Samia katika asasi hiyo ni pamoja na kusimamia amani Mashariki mwa DRC hivyo, ataendeleza jitihada zake pale ambapo uongozi uliopita uliishia.

Mkutano huo pia, umemthibitisha Mwenyekiti wa SADC ambapo, Mhe. Emerson Bambudzo Mnangagwa Rais wa Jamhuri ya Zimbabwe amepokea jukumu hilo na nafasi ya Makamu Mwenyekiti wa SADC imeenda kwa Mhe. Andry Rajoelina Rais wa Jamhuri ya Madagascar ambapo nchi hizo zitaongoza katika kipindi cha 2024/2025.

Akihutubia mkutano huo Mwenyekiti wa SADC, Mhe. Mnangangwa amempongeza Mhe. Rais Samia kwa kupokea jukumu la uenyekiti wa SADC na amemuhakikishia ushirikiano katika kufanikisha majukumu hayo waliyokabidhiwa kwa ustawi wa kanda na wananchi wake.

Pia, ameeleza kuwa jumuiya hiyo inaendelea kufungua fursa mbalimbali kwa ajili ya maendeleo endelevu ya kikanda kupitia agenda yake ya kipaumbele ya maendeleo ya viwanda. Jitihada hizo zitakuza ubunifu na kuongeza thamani ya bidhaa katika masoko ya kikanda na kimataifa.

Kuhusu shughuli nyingine zilizofanyika sambamba na mkutano huo Mhe. Mnangagwa ameeleza kuwa kulikuwa na Kongamano la Uwekezaji lililoandaliwa na Benki ya Kiarabu ya Maendeleo ya Kiuchumi Afrika (BADEA) na Wiki ya Viwanda ambazo zilitumika kuonesha bidhaa na huduma mbalimbali kutoka nchi wanachama pamoja na kutoa fursa kwa wafanyabishara kubadilishana uzoefu na kukuza mtandao wa biashara.

Shughuli nyingine iliyofanyika ni pamoja na mhadhara wa umma ambao unasaidia katika kujenga uelewa wa masuala ya msingi ambayo husaidia katika ubunifu na kuendelea kuimarisha hatua za mtangamano. Hivyo ni muhimu kwa vyuo vikuu na vyuo vingine vinavyofanana navyo kutafakari namna bora ya kuwekeza katika ubunifu ili kuwezesha mikakati ya kikanda kupata matokeo ya kimaendeleo kwa mafanikio.

Pamoja na hayo amesisitiza umuhimu wa kukuza sekta ya nishati, kilimo, biashara, uwekezaji na usafirishaji na kuhimiza umuhimu wa nguvu ya pamoja katika kutatua changamoto zake na kuiwezesha jumuiya hiyo kuinuka kiuchumi.

Mkutano huo wa Wakuu wa Nchi na Serikali pia umemalizika kwa nchi wanachana kusainiwa Itifaki na matamko mbalimbali ya kikanda, kwa upande wa Tanzania imesaini Itifaki ya Ajira na Kazi, Tamko la Kuwalinda Watu Wenye Ulemavu wa Ngozi na Tamko la Kutokomeza Ugonjwa wa Ukimwi kama Janga la Kiafya kwa Jamii ya Ukanda wa SADC ifikapo 2030.

Wakuu wa Nchi na Serikali wa Jumuiya ya Maendeleo Kusini mwa Afrika (SADC)  wakiwa katika picha ya pamoja  wakati wa Mkutano wao Kawaida wa 44 uliofanyika tarehe 17 Agosti, 2024Harare, Zimbabwe.

Rais wa Jamhuri ya Muungano wa Tanzania, Mhe. Dkt. Samia Suluhu Hassan (wa pili kushoto) akishiriki Mkutano wa Kawaida wa 44 wa Wakuu wa Nchi na Serikali wa SADC uliofanyika tarehe 17 Agosti, 2024 Harare, Zimbabwe.

ZAMBIA YAIHAKIKISHIA TANZANIA USHIRIKIANO KATIKA UONGOZI WA SADC ORGAN TROIKA

 

Rais wa Jamhuri ya Zambia, Mhe. Hakainde Hichilema ameihakikishia ushirikiano Jamhuri ya Muungano wa Tanzania wakati huu inapotarajia kukabidhiwa jukumu la uenyekiti wa Asasi ya Ushirikiano wa Siasa, Ulinzi na Usalama ya SADC (SADC Organ on Politics, Defence and Security) na kuahidi kutimiza majukumu yake kama Mwenyekiti anayemaliza muda wake kwa kipindi cha 2023/2024.

 

Kadhalika, ameshukuru kwa ushirikiano alioupata wakati wa uongozi wake na pia ameonesha kuwa na imani na Tanzania katika kupokea jukumu la unyekiti wa Asasi ya SADC Organ Troika.

 

“Nipende kumhakikishia ushirikiano dada yangu Rais wa Jamhuri ya Muungano wa Tanzania, Mhe. Samia Suluhu Hassan na wasaidizi wake, pia nina imani utaiongoza Organ na kuifikisha katika hatua ya juu ya mafanikio kama ambavyo umekuwa ukifanya katika majukumu mengine uliyoaminiwa” Mhe. Hichilema.

 

Hayo yamejiri wakati wa Mkutano wa Wakuu wa Nchi na Serikali wa Asasi hiyo ya SADC Organ Troika uliofanyika tarehe 16 Agosti, 2024 Harare, Zimbabwe na kuhudhuria na Mhe. Hichilema Rais wa Jamhuri ya Zambia na Mwenyekiti wa sasa ambaye ameshiriki kwa njia ya mtandao.

 

Mbali na Mhe. Hichilema Mkutano huo pia umehudhuriwa na Mhe. Nangolo Mbumba Rais wa Namibia na Mwenyekiti wa Organ aliyemaliza muda wake na Mhe. Dkt. Samia Suluhu Hassan, Rais wa Jamhuri ya Muungano wa Tanzania na Mwenyekiti ajaye wa Asasi hivyo, kukamilisha safu ya nchi zinazounda Utatu huo.

 

Aidha, katika hotuba wakati wa kufungua na kufunga mkutano Mhe. Hichilema amewashukuru wajumbe wa mkutano huo kwa kutumia muda wao na rasilimali zao kuhudhuria na kushiriki kikamilifu katika mijadala mbalimbali yenye maslahi ya kanda.

 

“Ni matumaini yangu kuwa agenda zilizowasilishwa mbele yetu zitajadiliwa kwa tija na kwa maslahi ya pande zote kwa ajili ya ustawi wa Jumuiya na watu wetu” alisema Mhe. Hichilema.

 

Hivyo, ni muhimu kuwa tayari kuonesha umoja na nia ya kufanikiwa kwa pamoja katika kuijenga jumuiya yenye amani na usalama hali ambayo itachangia kukuza uchumi kupitia shughuli za biashara na uwekezaji kwenye kanda.

 

Pia, alitoa shukrani za kipekee kwa Jamhuri ya Namibia kwa kipindi ambacho imeongoza kupitia Hayati Rais Hage Geingob na Rais wa sasa Mhe. Dkt. Nangolo Mbumba, sambamba na Sekretarieti ya SADC kwa usikivu, uvumilivu na uongozi wa mfano wa Bw. Elias Magosi ambaye pamoja na timu yake wamekuwa wakifanya kazi bila kuchoka kuratibu kufanyika kwa mikutano hiyo.

 

Vilevile akaeleza kuwa utatu wa asasi hiyo ni utaratibu mzuri wa kuendesha taasisi yoyote yenye lengo la kufikia mafanikio kwakuwa, inaruhusu muendelezo wa utekelezaji wa masuala mbalimbali ya kikanda na kuhifadhi kumbukumbu ya masuala mbalimbali ili hurahisisha ufuatiliaji na maamuzi.

 

Tanzania inatarajia kukabidhiwa nafasi ya uenyekiti wa Asasi ya Ushirikiano katika masuala ya Siasa, Ulinzi na Usalama ya SADC (SADC Organ on Politics, Defence and Security) katika Mkutano wa Kawaida wa 44 wa Wakuu wa Nchi na Serikali utakaofanyika tarehe 17 Agosti, 2024 Harare, Zimbabwe.

 

Pamoja na masuala mengine mkutano huo wa Wakuu wa Nchi na Serikali wa SADC Organ Troika umepitia na kujadili hali ya ulinzi na usalama katika kanda, hali ya ulinzi na usalama katika Falme za Eswatini na Lesotho, hali ya ulinzi na usalama katika jimbo la Cabo Del Gado na hali ya ulinzi na usalama Mashariki mwa Jamhuri ya Kidemokrasia ya Congo.

Habari katika picha, wakati Rais Samia aliposhiriki Mkutano wa Wakuu wa Nchi na Serikali wa  SADC Organ Troika

WAZIRI KOMBO ASISITIZA AMANI NA USALAMA KATIKA KANDA YA SADC

Waziri wa Mambo ya Nje na Ushirikiano wa Afrika Mashariki, Mhe. Mahmoud Thabit Kombo amesisitiza umuhimu wa kuendelea kuimarisha amani na usalama katika kanda ya Jumuiya ya Maendeleo Kusini mwa Afrika (SADC).

Balozi Kombo ametoa Msisitizo huo wakati wa Mkutano wa Kamati ya Mawaziri wa Asasi ya Ushirikiano katika masuala ya Siasa, Ulinzi na Usalama (MCO) wa Jumuiya ya Maendeleo Kusini mwa Afrika (SADC)  uliofanyika Harare, Zimbabwe tarehe 16 Agosti, 2024.

Mkutano huo ulitanguliwa na Mkutano wa Makatibu Wakuu uliofanyika tarehe 15 Agosti, 2024 ambapo, mikutano hii miwili ni mikutano ya awali ya maandalizi ya agenda na nyaraka kwa ajili ya Mkutano wa Wakuu wa Nchi na Serikali wa Asasi ya Siasa, Ulinzi na Usalama ya Jumuiya ya Maendeleo Kusini mwa Afrika (SADC) utakaofanyika leo tarehe 16 Agosti, 2024.

Akifungua mkutano huo Mwenyekiti wa Kamati ya Mawaziri wa Asasi hiyo na Waziri wa Mambo ya Nje wa Jamhuri ya Zambia, Mhe. Dkt. Mulambo Haimbe amewakaribisha wajumbe wa mkutano huo kujadili ajenda zilizojikita katika kutafuta amani na usalama wa Jumuiya hiyo na umuhimu wa nguvu ya pamoja katika kufanikisha jitihada za suala hilo.

Agenda zilizojadiliwa na mkutano huu ni pamoja na Hali ya Ulinzi na Usalama katika Kanda, Uimarishwaji wa Demokrasia katika Kanda, Mfumo wa Kuwaenzi Viongozi Waasisi wa SADC na Wagombea wa Nafasi mbalimbali wa Kanda katika Jumuiya za Kikanda na Kimataifa.

Akichangia katika mkutano huo Waziri Kombo amesema kuwa Tanzania inalipa kipaumbele suala la kuimarisha ulinzi na usalama katika kanda na katika kufanikisha hili Tanzania inashiriki kikamilifu katika juhudi za kutafuta amani ndani ya kanda, barani Afrika na duniani ikiwa ni pamoja na kuchangia gharama zake.

“Tuna nia ya dhati ya kuunga mkono juhudi za kikanda na kimataifa katika masuala ya amani na usalama. Tunaamini uzoefu wetu utatuwezesha kuchangia kwa ufanisi katika jukumu la Baraza la Usalama” alisema waziri Kombo.

Aidha, Waziri Kombo amewasilisha ombi la kuendelea kuungwa mkono na nchi za SADC katika nafasi mbalimbali zinazowaniwa na Watanzania ikiwemo nafasi ya Mkurugenzi wa Shirika la Afya Duniani (WHO) – Afrika inayowaniwa na Dkt. Faustine Ndugulile.

Pia, ameomba kuungwa mkono katika nafasi ya Ujumbe wa Baraza la Haki za Binadamu la Umoja wa Mataifa kwa kipindi cha mwaka 2026 – 2028 na Ujumbe usio wa kudumu wa Baraza la Usalama la Umoja wa Mataifa kwa kipindi cha mwaka 2029 na 2030.

Mkutano huo pia umehudhuriwa na Waziri wa Ulinzi na Jeshi la Kujenga Taifa Mhe. Dkt. Stergomena Tax (Mb.), Waziri wa Nchi, Ofisi ya ya Rais – Ikulu, Zanzibar, Mhe. Ali Suleiman Ameir (MBW) na Maafisa Waandamizi kutoka katika Wizara, Idara na Taasisi za Serikali.

======================================= 

Waziri wa Mambo ya Nje na Ushirikiano wa Afrika Mashariki, Mhe. Mahmoud Thabit Kombo (Mb.) akishiriki Mkutano wa Kamati ya Mawaziri wa Asasi ya Ushirikiano katika masuala ya Siasa, Ulinzi na Usalama wa Jumuiya ya Maendeleo Kusini mwa Afrika (MCO) uliofanyika Harare, Zimbabwe tarehe 16 Agosti, 2024.

Kushoto ni Waziri wa Ulinzi na Jeshi la Kujenga Taifa, Mhe. Dkt. Stergomena Tax (Mb.) na kulia ni Waziri wa Nchi, Ofisi ya Rais – Ikulu, Zanzibar, Mhe. Ali Suleiman Ameir (MBW) wakifuatilia Mkutano wa Kamati ya Mawaziri wa Asasi ya Ushirikiano katika masuala ya Siasa, Ulinzi na Usalama wa Jumuiya ya Maendeleo Kusini mwa Afrika (MCO) uliofanyika tarehe 16 Agosti, 2024.

Kushoto ni Waziri wa Ulinzi na Jeshi la Kujenga Taifa, Mhe. Dkt. Stergomena Tax (Mb.) na kulia ni Waziri wa Nchi, Ofisi ya Rais – Ikulu, Zanzibar, Mhe. Ali Suleiman Ameir (MBW) wakifuatilia Mkutano wa Kamati ya Mawaziri wa Asasi ya Ushirikiano katika masuala ya Siasa, Ulinzi na Usalama wa Jumuiya ya Maendeleo Kusini mwa Afrika (MCO) uliofanyika tarehe 16 Agosti, 2024.

Kulia ni Mhe. Dkt. Ndugulia anayewania nafasi ya Mkurugenzi wa Shirika la Afya Duniani (WHO) Kanda ya Afrika. 

Kulia ni Mkuu wa Majeshi ya Ulinzi nchini, Jenerali Jacob Mkunda akifuatilia Mkutano wa Kamati ya Mawaziri wa Asasi ya Ushirikiano katika masuala ya Siasa, Ulinzi na Usalama wa Jumuiya ya Maendeleo Kusini mwa Afrika (MCO) uliofanyika Harare, Zimbabwe tarehe 16 Agosti, 2024.

Ujumbe wa Tanzania ukiwa umesisiamam wakati wimbo wa SADC uliokuwa ukiimbwa kabla ya kuanza kwa mkutano.

Ujumbe wa Zambia

Sehemu nyingine ya Ujumbe wa Tanzania

KATIBU MKUU MAMBO YA NJE AONGOZA UJUMBE WA TANZANIA KATIKA KIKAO CHA KAMATI YA MAKATIBU WAKUU WA SADC ORGAN TROIKA

 

Katibu Mkuu Wizara ya Mambo ya Nje na Ushirikiano wa Afrika Mashariki ameongoza ujumbe wa Tanzania katika kikao cha Kamati ya Makatibu Wakuu cha Asasi ya Siasa, Ulinzi na Usalama ya Jumuiya ya Maendeleo Kusini mwa Afrika (SADC) uliofanyika tarehe 15 Agosti, 2024.

Mkutano huo pamoja na masuala mengine umejadili Hali ya Siasa, na Usalama katika kanda.

Nchi zilizoshiriki kikao hicho cha utatu ni pamoja na Tanzania, Zambia na Namibia.

TANZANIA KUSHIRIKIANA NA IOM KUWEZESHA VIJANA

Tanzania imesisitiza kuendelea kushirikiana na Shirika la Umoja wa Mataifa lilanoshughulikia Wahamiaji (IOM) kuwawezesha vijana kiuchumi ili kutengeneza ajira zitakazojenga ustawi wao na kuleta maendeleo kwa taifa.

Msisitizo huo umetolewa leo tarehe 15 Agosti, 2024 wakati Waziri wa Mambo ya Nje na Ushirikiano wa Afrika Mashariki, Mhe. Mahmoud Thabit Kombo alipokutana na Katibu Mtendaji wa Shirika la Umoja wa Mataifa linaloshughulikia Wahamiaji (IOM) Bw. Mohammed ABDIKER jijini Harare, Zimbabwe.

Aidha, katika mazungungumzo hayo Waziri Kombo ameeleza changamoto ya uhamiaji huwaathiri zaidi vijana wanaotoka katika mataifa yanayoendelea hususan mataifa ya Afrika ambapo wamekuwa wakihama kwenda kutafuta maisha bora kwa ajili yao na familia zao.

"Binafsi ningependa tatizo la uhamiaji lipate suluhisho kwa kufanyia kazi chanzo cha tatizo badala ya kufanyia kazi matokeo au matatizo yanayotokea baada ya watu kuhama na kupata changamoto wakiwa katika harakati za kuvuka mipaka" alisema Waziri Kombo.

Pia ameeleza kuwa Serikali ya Awamu ya Sita ya Jamhuri ya Muungano wa Tanzania ya Mhe. Dkt. Samia Suluhu Hassan kwa kutambua changamoto hiyo imetafuta suluhisho la ajira kwa vijana wa kitanzania kwa kuwawezesha kiuchumi kupitia mradi wa kilimo ujulikanao kama “Building Better Tomorrow (BBT)’’ ambao, utawawezesha vijana kujiajiri na kuwaajiri wengine, pamoja na kufanya kilimo biashara kwa lengo la kukuza kipato.

Kwa upande wa Bw. ABDIKER ameipongeza Tanzania kwa kuwahudumia wahamiaji ambao sehemu kubwa ni wakimbizi na wale wanaopita kutoka Pembe ya Afrika kuelekea kusini mwa Afrika kutafuta maisha bora na kwamba IOM inaendelea kutoa ushirikiano katika kukabiliana na changamoto mbalimbali zinazojitokeza.

Pia amepongeza kwa uwepo wa chuo cha uhamiaji nchini ambacho kimekuwa kikitoa elimu ya uhamiaji kwa watanzania na kwa mataifa mengine na pia amesema kuwa IOM ina mpango wa kuanzisha chuo kikubwa cha uhamiaji kitakachochukua wanafunzi ulimwenguni kote, hivyo uwepo wa chuo hicho utaongeza ushirikiano na kujenga uwezo wa kitaaluma katika masuala ya uhamiaji.

Vilevile, viongozi hao wamejadili changamoto mbalimbali zinazowakabili wahamiaji ikiwemo, mabadiliko ya tabia nchi ambayo husababisha ajali kwenye safari za majini na kupelekea watu kupoteza maisha wakati wa kuhama sambamba na ajira zisizo na staha wanazozipata baada ya kufika uhamishoni pasipo kupata taratibu rasmi za kuhama.

Hivyo, IOM ina matumaini ya kuendelea kufanya kazi kwa karibu na Tanzania hasa wakati huu ambapo inaenda kukabidhiwa nafasi ya Mwenyekiti wa Asasi ya Ushirikiano wa Siasa, Ulinzi na Usalama ya SADC (SADC Organ on Politics, Defence and Security).

================================

Habari katika picha za mazungumzo ya Mhe. Waziri Kombo na Bw. Mohammed ABDIKER

Waziri wa Mambo ya Nje na Ushirikiano wa Afrika Mashariki, Mhe. Mahmoud Thabit Kombo akizungumza na Katibu Mtendaji wa Shirika la Umoja wa Mataifa linaloshughulikia Wahamiaji (IOM) Bw. Mohammed ABDIKER (hayupo pichani) jijini Harare, Zimbabwe tarehe 15 Agosti, 2024.

Katibu Mtendaji wa Shirika la Umoja wa Mataifa linaloshughulikia Wahamiaji (IOM) Bw. Mohammed ABDIKER akizungumza na Waziri wa Mambo ya Nje na Ushirikiano wa Afrika Mashariki, Mhe. Mahmoud Thabit Kombo (hayupo pichani) jijini Harare, Zimbabwe tarehe 15 Agosti, 2024.

Mazungumzo yakiendelea.