Waziri Mkuu wa Thailand awasili nchini kwa ziara ya siku tatu

Waziri Mkuu wa Thailand, Mhe. Bibi Yingluck Shinawatra akiteremka kwenye ndege mara baada ya kuwasili katika Uwanja wa Ndege wa Kimataifa wa Julius Nyerere, Jijini Dar es Salaam kwa ajili ya kuanza ziara yake ya siku tatu hapa nchini.

Mhe. Shinawatra akiwa na Mwenyeji wake Rais wa Jamhuri ya Muungano wa Tanzania, Mhe. Jakaya Mrisho Kikwete mara baada ya kuwasili nchini kwa ajili ya ziara ya siku tatu.

Mhe. Shinawatra akisalimiana na Mkuu wa Mkoa wa Dar es Salaam, Mhe, Said Mecky Sadick mara baada ya kuwasili nchini huku Mhe. Rais Kikwete, Mkuu wa Majeshi ya Ulinzi nchini, Jenerali Davis Mwamunyange na Mkuu wa Itifaki, Balozi Mohammed Maharage wakishuhudia.

Mhe. Shinawatra akikagua Gwaride la Heshima.

Mhe. Shinawatra na mwenyeji wake Rais Kikwete wakisiliza nyimbo za mataifa yao zilipopigwa kwa heshima ya mgeni huyo.

Mhe. Shinawatra na Mwenyeji wake Rais Kikwete wakiangalia burudani ya ngoma iliyotolewa na moja ya kikundi kilichokuwa Uwanjani hapo wakati wa mapokezi.

Mhe. Shinawatra  kwa pamoja na Mhe. Rais Kikwete wakisalimiana na raia wa Thailand waliopo hapa nchini waliojitokeza kumlaki Waziri Mkuu huyo alipowasili katika Hoteli ya Hyatt Regency.

Katibu Mkuu wa Wizara ya Mambo ya Nje na Ushirikiano wa Kimataifa, Mhe. John Haule (kulia)  akiwa pamoja na Mkuu wa Itifaki, Balozi Mohammed Maharage (kushoto),  Mkurugenzi wa Idara ya Asia na Australasia, Balozi Mbwelwa Kairuki na Afisa Mambo ya Nje, Bw. John Pangipita wakibadilishana mawazo kuhusu ziara ya Waziri Mkuuu wa Thailand hapa nchini.

Picha na Reginald Philip

TAARIFA KWA VYOMBO VYA HABARI: UJIO WA WAZIRI MKUU WA THAILAND

TAARIFA KWA VYOMBO VYA HABARI

Waziri Mkuu wa Thailand, Mheshimiwa Yingluck Shinawatra, anatarajiwa kuwasili jijini Dar es Salaam kesho, tarehe 30 Julai, 2013 mchana kwa ziara ya siku tatu nchini Tanzania  kwa mwaliko wa Rais Jakaya Mrisho Kikwete.

Bibi Shinawatra, ambaye atatokea Msumbiji, atalakiwa kwenye Uwanja wa Ndege wa Kimataifa wa Julius Nyerere na mwenyeji wake, Rais Kikwete, na kupigiwa  mizinga 19 kwa heshima yake.

Wakati wa adhuhuri, Waziri Mkuu wa Thailand atafanya mazungumzo rasmi na Rais Kikwete, Ikulu na baadaye kutia saini mikataba mbalimbali ya ushirikiano kati ya Tanzania na Thailand.

Kabla ya kuhudhuria dhifa ya Taifa itakayoandaliwa na mwenyeji wake, Ikulu, Bibi Shinawatra, ambaye anafuatana na ujumbe wa wafanyabiashara takriban 70 wa Thailand, atahutubia mkutano wa Uwekezaji wa Biashara kati ya Thailand na Tanzania kwenye Hoteli ya Hyatt Regency Kilimanjaro, ambao utahudhuriwa na Wafanyabiashara na Wawekezaji kutoka Thailand na wawekezaji wa ndani (Tanzania), Wanadiplomasia, Wasomi na Viongozi mbalimbali kutoka serikalini. Katika mkutano huo, Waziri Mkuu wa Thailand ataelezea sera ya uchumi ya nchi yake kwa Tanzania na Bara la Afrika. Baada ya hapo, Waziri Mkuu huyo atazuru maonyesho ya biashara hotelini hapo.

Katika siku ya pili ya Ziara yake, Mgeni huyo wa Taifa atatembelea Mbuga ya Wanyama ya Serengeti mkoani Mara, ambako atajifunza namna Mamlaka za Tanzania zinavyosimamia na kutunza Hifadhi za Taifa za Wanyamapori. Waziri Mkuu Shinawatra atakabidhi Vifaa mbalimbali vya kupambana na majangili kwa Mamlaka ya Taifa ya Hifadhi za Wanyama (TANAPA).

Mgeni huyo atarejea Dar es Salaam tarehe 1 Agosti na kuagwa na mwenyeji wake, Rais Kikwete kwenye Uwanja wa Ndege wa Kimataifa wa Julius Nyerere, tayari kwa safari ya kuelekea nchini Uganda.

IMETOLEWA NA: WIZARA YA MAMBO YA NJE NA USHIRIKIANO WA KIMATAIFA,

DAR ES SALAAM

Julai 29, 2013

TAARIFA KWA VYOMBO VYA HABARI

 

Mkurugenzi wa Mashariki ya Kati akutana na Wajumbe wa Umoja wa Vijana wa IYDU

Mkurugenzi wa Idara ya Mashariki ya Kati, Balozi Simba Yahya akizungumza na Wajumbe wa Umoja wa Vijana wa Kimataifa wa masuala ya Demokrasia (IYDU) kwa niaba ya Waziri wa Mambo ya Nje na Ushirikiano wa Kimataifa, Mhe. Bernard K. Membe (Mb.) kuhusu nafasi ya Sera ya Mambo ya Nje katika kusimamia Demokrasia nchini. Vijana hao kutoka  nchi 19 za Mabara  yote Duniani wapo nchini kushiriki mkutano wa Bodi wa IYDU.Mkutano huo ulifanyika katika Ukumbi wa Mikutano wa Kimataifa wa Julius Nyerere (JNICC), jijini Dar es Salaam tarehe 29 Julai, 2013.

Baadhi ya Wajumbe wa IYDU  wakifuatilia kwa makini mada iliyokuwa inawasilishwa na Balozi Yahya (hayupo pichani).

Bw. Aris Kalafatis ambaye ni Mwenyekiti  wa Umoja wa Vijana wa Kimataifa wa Masuala ya Demokrasia (IYDU) akieleza madhumuni ya ziara yao hapa nchini.

Bw. Deogratias Munishi, Katibu Mkuu wa Baraza la Vijana Chadema (BAVICHA), akiwatambulisha kwa Balozi Yahya (hayupo pichani) Wajumbe aliofuatana nao kabla  ya mkutano kuanza.

Bw. John Heche Mwenyekiti wa Baraza la Vijana la Chadema (BAVICHA), akielezea jambo wakati wa mkutano huo ambapo pia aliitoa shukrani kwa Wizara ya Mambo ya Nje na Ushirikiano wa Kimataifa kwa kuupokea Ujumbe huo wa Vijana.

Mmoja kati ya Wajumbe walio hudhuria, akiuliza swali wakati wa mkutano wao na Balozi Yahya.

Balozi Simba Yahya, akibadilishana mawazo na mmoja wa Wajumbe mara baada ya mazungumzo.

Balozi Simba Yahya akiwa katika Picha ya Pamoja, na Wajumbe wa Umoja wa Vijana wa Kimataifa wa Maswala ya Demokrasia (IYDU) mara baada ya kumaliza mazungumzo nao. 

Wizara yazungumza na Waandishi wa Habari kuhusu Utekelezaji wa Diplomasia ya Uchumi

Kaimu Mkuu wa Kitengo cha Mawasiliano Serikalini katika Wizara ya Mambo ya Nje na Ushirikiano wa Kimataifa, Bw. Mkumbwa Ally (mwenye suti) akizungumza na Waandishi wa Habari (hawapo pichani) kuhusu mafanikio ya Wizara katika kutekeleza  Diplomasia ya Uchumi. Wengine katika picha ni Balozi Simba Yahya (kushoto), Mkurugenzi wa Idara ya Mashariki ya Kati, Balozi Mbelwa Kairuki (kulia), Mkurugenzi wa Idara ya Asia na Australasia pamoja na Bibi. Zamaradi Kawawa, Mkurugenzi Msaidizi katika Wizara ya Habari, Utamaduni, Vijana na Michezo na Mratibu wa Mkutano huo.

 

Bibi Kawawa akizungumza kabla ya kumkaribisha Bw. Mkumbwa kuzungumza na Waandishi wa Habari.

Waandishi kutoka Vyombo mbalimbali vya Habari wakimsikiliza Bw. Mkumbwa (hayupo pichani) alipozungumza nao juu ya utekelezaji wa Diplomasia ya Uchumi.

Balozi Yahya (kushoto) akijibu moja ya swali lililoulizwa na Waandishi wa Habari.

Balozi Kairuki (kulia) akitoa ufafanuzi kwa baadhi ya hoja zilizotolewa naWaandishi wakati wa Mkutano na Waandishi wa Habari.

TAARIFA KWA VYOMBO VYA HABARI

Rais Kikwete aongoza Watanzania kuaga miili ya Askari 7 waliouawa nchini Sudan; Waziri Membe pia ahudhuria

Mhe. Jakaya Mrisho Kikwete, Rais wa Jamhuri ya Muungano wa Tanzania akiweka saini kitabu cha maombolezi leo, mara baada ya kuwasili kwenye Viwanja vya Diamond Jubilee, jijini Dar es Salaam.

Mhe. Dkt. Mohammed Gharib Bilal, Makamu wa Rais wa Jamhuri ya Muungano wa Tanzania, akisaini kitabu cha maombolezi mara baada ya kuwasili uwanjani hapo. 

Mke wa Rais Mama Salma Kikwete akiweka saini kwenye kitabu cha maombolezi.

 Mhe. Rais Jakaya Mrisho Kikwete akitafakari kwa kina tukio la mauaji wa Askari wa Tanzania lililotokea katika jimbo la Darfur nchini Sudan. Wengine katika picha ni Mhe. Shamsi Vuai Nahodha (Mb) (wa pili kushoto), Waziri wa Ulinzi na Jeshi la Kujenga Taifa, Mhe. Balozi Seif Ali Iddi (wa tatu kushoto) Makamu wa Pili wa Rais wa Serikali ya Mapinduzi ya Zanzibar, na Luteni Jenerali Samwel Ndomba (wa nne kushoto), Mnadhimu Mkuu wa Majeshi nchini.

Mhe. Bernard K. Membe (Mb), (wa pili kushoto), Waziri wa Mambo ya Nje na Ushirikiano wa Kimataifa, naye alishiriki katika kuaga miili ya Askari 7 waliouawa nchini Sudan hivi karibuni. 

Mh. Waziri Membe akibadilishana mawazo na Katibu Mkuu wa CCM, Mhe. Abdulrahman Kinana. Kulia ni Mkuu wa Mkoa wa Dar es Salaam, Mhe. Said Meck Sadiki.

Amiri Jeshi Mkuu wa Majeshi ya Ulinzi na Usalama Tanzania, Mhe. Rais Kikwete akizungumza kwa masikitiko wakati wa kuaga miili ya Askari saba wa kulinda amani waliouawa na waasi katika jimbo la Darfur, nchini Sudan hivi karibuni.  Rais Kikwete amevitaka vikosi vya ulinzi nchini kutokata tamaa kutokana na maafa hayo bali wazidishe moyo na kuendelea kulitumikia kwa ufasaha Taifa lao. 

Miili ya Askari wa kulinda amani wa Tanzania waliouawa katika jimbo la Darfur nchini Sudan, ikiwasili kwenye Viwanja vya Diamond Jubilee tayari kwa kuagwa na wananchi, ndugu, jamaa na marafiki.

Simanzi na majonzi viliwatala kwa familia za Marehemu.

Mhe. Rais Kikwete na Mkewe Mama Salma Kikwete wakitoa heshima zao za mwisho kwa miili ya Marehemu.

Makamu wa Rais Dkt. Mohammed Gharib Bilal akitoa heshima zake za mwisho kwa Marehemu.

Mke wa Rais Mama Salma Kikwete (kulia) na Mke wa Makamu wa Rais wa pili wa Zanzibar Mama Asha Suleiman Iddi (katikati), pamoja na Katibu wa NEC, Siasa na Uhusiano wa Kimataifa, Dk. Asha-Rose Migiro wakiwa kwenye majonzi mazito mara baada ya kutoa heshima zao za mwisho kwa Marehemu hao.

Mkuu wa Jeshi la Wananchi wa Tanzania (JWTZ) Meja Jenerali Davis Mwamunyange akitoa saluti za heshima za mwisho kwa Marehemu hao.

Mkurugenzi Mkazi wa UNDP nchini Tanzania,  Bw. Phillipe Poinso akitoa heshima za mwisho kwa Askari wa Tanzania wa kulinda amani waliouawa jimbo la Darfur nchini Sudan hivi karibuni.  Bw. Poinso alikuwa akimwakilisha Mratibu Mkazi wa Umoja wa Mataifa nchini Dkt. Alberic Kacou.

Umati wa Wanajeshi na Wananchi waliokusanyika katika uwanja wa Diamond Jubilee leo kuaga miili ya Askari hao saba.

Picha zote na maelezo kwa hisani ya Zainul Mzige wa www.dewjiblog.com

Mhe. Membe akutana kwa mazungumzo na Waziri wa Mambo ya Nje wa New Zealand

Waziri wa Mambo ya Nje na Ushirikiano wa Kimataifa, Mhe. Bernard K. Membe (Mb.) akizungumza masuala mbalimbali katika kuimarisha ushirikiano kati ya Tanzania na New Zealand alipokutana na Waziri wa Mambo ya Nje wa nchi hiyo Mhe. Murray McCully tarehe 22 Julai 2013. Mhe. McCully na ujumbe wake wapo nchini kwa ziara ya kikazi ya siku mbili tarehe 21  na 22 Julai, 2013.

Mhe. McCully nae akimweleza Mhe. Membe masuala ya msisitizo katika kuimarisha ushirikiano baina ya nchi hizi mbili ikiwemo ushirikiano katika masuala ya biashara na kilimo.

Mhe. Membe na wajumbe kutoka Tanzania na New Zealand wakimsikiliza Mhe. McCully.

Mhe. Membe  akimkabidhi Mhe. McCully zawadi ya kinyago mara baada ya mazungumzo yao.

Mhe. Membe akiagana na mgeni wake mara baada ya mazungumzo yao.

Tanzania yadhamiria kushirikiana na New Zealand kukuza sekta ya kilimo

Waziri wa Mambo ya Nje wa New Zealand, Mhe. Murray McCully amewasili nchini kwa ziara ya kikazi ya siku mbili kuanzia tarehe 21- 22 Julai, 2013.

 Wakati wa ziara hiyo, Mhe. McCully atafanya mazungumzo na Viongozi wa Kitaifa wa Serikali akiwemo Waziri Mkuu wa Jamhuri ya Muungano wa Tanzania, Mhe. Mizengo Peter Pinda (Mb); Waziri wa Mambo ya Nje na Ushirikiano wa Kimataifa, Mhe. Bernard K. Membe (Mb); Wazri wa Nishati na Madini, Mhe. Prof. Sospeter Muhongo (Mb); na Waziri wa Fedha, Mhe. Dkt. William Mgimwa (Mb). 

Mazungumzo yao yanatarajiwa kujikita katika kuimarisha maeneo ya ushirikiano wa kiuchumi kati ya Tanzania na New Zealand. Tanzania ina lenga kujifunza kutoka New Zealand kutokana na nchi hiyo kupata mafanikio makubwa katika sekta ya kilimo hususan ufugaji na viwanda vya kusindika maziwa na mazao mengine.

Eneo lingine ambalo Tanzania inataka kushirikiana na New Zealand ni sekta ya nishati mbadala. Tanzania imedhamiria kukarabisha makampuni ya New Zealand kuwekeza nchini katika uzalishaji wa nishati ya nguvu ya jua na geothermal.

Kukaribishwa kwa makampuni hayo ni moja ya mikakati ya Serikali ya kufikia lengo lake la kuwapatia umeme asilimia 30 ya wananchi wa vijijini ifikapo mwaka 2015.

Waziri wa Mambo ya Nje wa New Zealand atua nchini Tanzania kwa ziara ya kikazi ya siku mbili

Waziri wa Mambo ya Nje wa New Zealand, Mhe. Murray McCully (kulia) akipeana mkono na Mkurugenzi wa Asia na Australasia katika Wizara ya Mambo ya Nje na Ushirikiano wa Kimataifa, Balozi Mberwa Kairuki wakati alipo wasili katika Uwanja wa Ndege wa Kimataifa wa Julius Nyerere. Mhe. McCully yupo nchini kwa ziara ya siku mbili ambapo atajadili na Viongozi wa Kitaifa wa Serikali namna ya kukuza na kuimarisha ushirikiano wa kiuchumi kati ya Tanzania na New Zealand.

Balozi Kairuki na Mhe. McCully wakielekea chumba maalum kwa ajili ya kufanya mazungumzo.

Waziri wa Mambo ya Nje wa New Zealand (kushoto) akiwa katika maungumzo na Balozi Kairuki.