RAIS MWINYI AWAKARIBISHA WAWEKEZAJI WA INDONESIA KUWEKEZA NCHINI KATIKA SEKTA YA UCHUMI WA BULUU

Rais wa Zanzibar na Mwenyekiti wa Baraza la Mapinduzi, Mhe. Hussein Ali Mwinyi amewakaribisha wawekezaji kutoka Indonesia na sehemu nyingine duniani kuja kuwekeza nchini katika Sekta ya Uchumi wa Buluu hususan kwenye maeneo ya Utalii, Bandari, Uvuvi na Kilimo cha Baharini, Uchukuzi na uchimbaji wa Mafuta na Gesi.

 

Mhe. Rais Mwinyi ametoa mwaliko huo wakati akifungua rasmi Jukwaa la Uwekezaji kati ya Zanzibar na Indonesia lililofanyika jijini Bali, Indonesia leo tarehe 1 Septemba, 2024.

 

Mhe. Rais Mwinyi ambaye yupo nchini hapa kwa ajili ya kumwakilisha Rais wa Jamhuri ya Muungano wa  Tanzania, Mhe. Dkt. Samia Suluhu Hassan kwenye Mkutano wa Jukwaa la Pili la Ushirikiano wa Indonesia na Afrika amesema, Indonesia ni miongoni mwa nchi zilizopiga hatua kubwa kwenye sekta ya uchumi wa buluu duniani na kwamba Tanzania imejipanga kunufaika kupitia sekta hiyo kwa kuwashirikisha wadau mbalimbali ikiwemo wawekezaji kutoka Indonesia na kwingine duniani.

 

 “Tunaamini kwamba uzoefu uliowawezesha Indonesia kupiga hatua kubwa kwenye Sekta ya Uchumi wa Buluu utatuwezesha na sisi kujifunza na kufanikiwa. Hivyo tumekuja kuwaonesha na kujifunza  kutoka kwa wenzetu waliopiga hatua kwenye maeneo niliyozungumzia ikiwemo Uvuvi, kilimo cha mwani, uchukuzi, utalii na uchimbaji wa mafuta na gesi” amesema Mhe. Rais Mwinyi.

 

Awali akizungumza kwenye Kongamano hilo, Naibu Waziri wa Mambo ya Nje wa Indonesia, Mhe. Pahala Mansury amesema Sera ya Mambo ya Nje ya Indonesia na ile ya Tanzania zinafanana kwa kiasi kikubwa ambapo zote zinasisitiza katika kuchochea maendeleo kupitia diplomasia ya uchumi. Hivyo, Kongamano hilo ni njia mojawapo ya kutekeleza sera hizo katika kuhamasisha uwekezaji na biashara ili kuinua uchumi wa nchi hizi mbili.

 

Pia alimshukuru Mhe. Rais Mwinyi na ujumbe wake kwa kushiriki Kongamano hilo ambalo linalenga kuangazia maeneo mapya ya ushirikiano baina ya Tanzania na Indonesia katika sekta ya uchumi wa buluu kwa manufaa ya pande mbili.

 

Wakati wa Kongamano hilo ambalo limeandaliwa na Mamlaka ya Uwekezaji Zanzibar (ZIPA), mada mbalimbali kuhusu uwekezaji ziliwasilishwa na Taasisi za Tanzania ikiwemo ZIPA na Kituo cha Uwekezaji Tanzania (TIC).

 

Ujumbe wa Mhe. Rais Mwinyi ulioshiriki Jukwaa hilo unamjumuisha Waziri wa Nchi, Ofisi ya Rais, Kazi, Uchumi na Uwekezaji Zanzibar, Mhe. Sharif Ali Sharif, Waziri wa Madini, Mhe. Anthony Mavunde, Naibu Waziri wa Mambo ya Nje na Ushirikiano wa Afrika Mashariki, Mhe. Cosato Chumi, Naibu Katibu Mkuu, Wizara ya Fedha na Mipango, Mhe. Amina Khamis Shaaban, Balozi wa Tanzania nchini Indonesia, Mhe. Macocha Tembele pamoja na wafanyabiashara na wawekezaji kutoka Tanzania na Indonesia.

 

Mkutano wa Pili wa Jukwaa la Indonesia na Afrika utafanyika jijini Bali, kuanzia tarehe 1 hadi 3 Septemba 2024.

Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi akizungumza wakati wa Kongamano la Biashara kati ya Zanzibar na Indonesia lililofanyika jijini Bali tarehe 1 Septemba 2024 pembezoni mwa Mkutano wa Pili wa Jukwaa la Indonesia na Afrika litakalofanyika nchini hapa kuanzia tarehe 1 hadi 3 Septemba 2024. Mhe. Rais Mwinyi alimwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan kwenye Mkutano wa Jukwaa hilo

Naibu Waziri wa Mambo ya Nje wa Indonesia, Mhe. Pahala Mansury akizungumza wakati wa Kongamano la Biashara kati ya Zanzibar na Indonesia

Waziri wa Madini, Mhe. Anthony Mavunde (kulia) akishiriki Kongamano la Biashara kati ya Zanzibar na Indonesia. Kushoto ni Naibu Waziri wa Mambo ya Nje na Ushirikiano wa Afrika Mashariki, Mhe. Cosato Chumi naye akishiriki Kongamano hilo. 

Mhe. Rais Dkt. Mwinyi akiwa ameongozana na Balozi wa Tanzania nchini Indonesia, Mhe. Macocha Tembele mara baada ya kuwasili kwa ajilio ya kushiriki Kongamano la  Biashara kati ya Zanzibara na Indonesia lililofanyika pembezoni mwa Mkutano wa Pili wa Jukwaa la Indonesia na Afrika

Mkurugenzi wa Idara ya Mambo ya Nje Zanzibar, Balozi Silima Haji akishiriki Kongamano la Biashara kati ya Zanzibar na Indonesia

Kaimu Mkurugenzi wa Idara ya Asia na Australasia, Bw. John Kambona akiwa na Afisa Dawati kutoka Idara hiyo, Bw. Suleiman Magoma wakishiriki Kongamano la Biashara

Sehemu ya wafanyabiashara na wawekezaji wa Indonesia wakishiriki Kongamano la Biashara na Uwekezaji kati ya Zanzibar na Indonesia

Mkuu wa Utawala katika Ubalozi wa Tanzania nchini Indonesia, Bw. Suleiman Saleh akishiriki Kongamano hilo

Picha ya pamoja

 

RAIS DKT. MWINYI AWASILI INDONESIA

Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi amewasili jijini Bali,Indonesia leo tarehe 31 Agosti 2024 kwa ajili ya kumwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan katika Mkutano wa Jukwaa la Pili la Indonesia na Afrika unaofanyika jijini hapa kuanzia tarehe 1 hadi 3 Septemba 2024.

Mara baada ya kuwasili Mhe. Rais Mwinyi ambaye ameambatana na mwenza wake Mhe. Mama Mariam Mwinyi pamoja na Viongozi Waandamizi wa Serikali alipokelewa na Naibu Waziri  wa Biashara wa Indonesia Mhe, Jerry Sambuaga. 

Mkutano wa Pili wa Jukwaa la Indonesia na Afrika ambao utafanyika chini ya kaulimbiu isemayo "Bandung Spirit for Africa's Agenda 2063,” unalenga kuangazia kanuni za pamoja ambazo zimeweka msingi imara wa kuwa na uhusiano jumuishi, usawa na endelevu kati ya Indonesia na Afrika. 

Maeneo muhimu ya ushirikiano yanayotarajiwa kujadiliwa katika Jukwaa hilo ni pamoja na biashara, uwekezaji, kilimo na usalama wa chakula, nishati, uchumi wa buluu, madini, afya na ushirikiano wa maendeleo.

Mbali na kushiriki Mkutano huo, Mhe. Rais Mwinyi atafanya ziara ya kikazi nchini Indonesia kuanzia tarehe 04 hadi 06 Septemba 2024. 

 

TAARIFA KWA UMMA

 

Ujumbe wa Tanzania washiriki Mazoezi ya ‘Walk the Talk’

Brazzaville, Congo 

25 Agosti 2024

 

Waziri wa Afya, Mhe. Jenista Mhagama, pamoja na Waziri wa Mambo ya Nje na Ushirikiano wa Afrika Mashariki, Mhe. Balozi Mahmoud Thabit Kombo, wameungana na mgombea wa Tanzania kwa nafasi ya Mkurugenzi wa Kanda ya Afrika wa Shirika la Afya Duniani (WHO), Dkt. Faustine Ndugulile (MB), katika mazoezi ya ‘Walk the Talk’.

 

Tukio hili la mazoezi ya ‘Walk the Talk’ lililofanyika Jijini Brazzaville, na kuhudhuriwa na wajumbe mbalimbali waliowasili; lina lenga kuimarisha afya pamoja na kupiga vita magonjwa yasiyoambukiza. 

 

Wakiwa kwenye mazoezi hayo, Waziri Mhagama na Waziri Kombo walipata fursa ya kusalimiana na mawaziri wenzao  na kuwaomba kuunga mkono mgombea wa Tanzania Dkt. Ndugulile katika juhudi zake za kuwania nafasi hii muhimu, huku wakisisitiza umuhimu wa kuwa na maisha yenye afya na kufuata mifumo bora ya kuzuia magonjwa.

 

Wakati wa tukio hilo, viongozi hawa wa Tanzania walikuwa sehemu ya ujumbe wa Jamhuri ya Muungano wa Tanzania ulioandamana na Dkt. Ndugulile kwa ajili ya kumnadi na kumpigia kura katika uchaguzi wa Mkutano wa 74 wa WHO Kanda ya Afrika.

 

Ushiriki wa Tanzania kwenye mazoezi haya ni sehemu ya maandalizi na mkakati wa kuhakikisha kuwa Dkt. Ndugulile anapata uungwaji mkono kutoka kwenye nchi wanachama wa WHO, na pia kuonesha dhamira ya Tanzania katika kukuza afya ya jamii. 

 

Pamoja na Mawaziri hawa wawili, ujumbe wa Tanzania kwenye mazoezi hayo umejumuisha pia wabunge mahiri kwenye masuala ya chaguzi za kimataifa wa Bunge la Jamhuri ya Muungano wa Tanzania ambao ni  Mwenyekiti wa Bunge Mhe. Dkt. Joseph Kizito Mhagama, pamoja na Mwenyekiti wa Kamati ya Kudumu ya Bunge ya Afya na Masuala ya UKIMWI, Mhe. Elibariki Emmanuel Kingu. Wengine ni Mhe. Neema Kichiki Lugangira, Mhe. Shamsia Azizi Mtamba, na Mhe. George Ranwell Mwenisongole.

 

Kauli Mbiu ya Dkt. Ndugulile kwenye kinyang’anyiro hiki ni “Pamoja, Tujenge Afya Bora Barani Afrika” yaani “Building a Healthier Africa Together” 

 

 

WAZIRI CHUMI ASHIRIKI MKUTANO MAALUM WA AFYA WA TICAD 9

Naibu Waziri Mambo ya Nje na Ushirikiano wa Afrika Mashariki Mhe. Cosato Chumi tarehe 24 Agosti 2024, ameshiriki mkutano Maalum wa afya pembezoni ya Mkutano wa Tisa wa TICAD ngazi ya Mawaziri unaofanyika jijini Tokyo. Mkutano huo uliongozwa na mada ya Ushirikiano Mpya kwa Usawa wa Afya Barani Afrika: Kuharakisha Ufikaji wa Huduma za Afya kwa Wote kwa Ubunifu kuelekea 2030.” Mkutano huo uliandaliwa na Muungano wa Chanjo (GAVI) na Tume ya Umoja wa Afrika (AUC) ulilenga kuangazia umuhimu wa ushirikiano na ubunifu katika kufanikisha upatikanaji wa huduma za afya kwa wote barani Afrika. Mkutano huo pia ulihudhuriwa na Naibu Waziri wa Mambo ya Nje wa Bunge la Japani Mhe. Fukazawa Yoichi. Kwa kushiriki katika mkutano huo Tanzania ilipata fursa ya kujionea namna bora ya kutoa huduma za afya kwa watu wote ili kuhakikisha kila Mtanzania anapata huduma hizo bila ya kikwazo cha kukosa hela.

WAZIRI CHUMI ASHIRIKI UZINDUZI WA LOGO YA SUMMIT YA TICAD9 2025 JAPAN

 

Tarehe 24 Agosti,2024, Naibu Waziri Mambo ya Nje na Ushirikiano wa Afrika Mashariki Mhe. Cosato Chumi ameshiriki katika hafla ya uzinduzi wa logo ya Mkutano wa Tisa wa TICAD wa Wakuu wa Nchi na Serikali utakaofanyika 2025 nchini Japan. 

Uzinduzi wa Logo hiyo ya Summit ya #TICAD9 umefanyika jijini Tokyo wakati wa Mkutano wa TICAD ngazi ya Mawaziri, ambao unafanya maandalizi ya Summit hiyo inayotarajiwa kufanyika tarehe 20 - 22 Agosti 2025, jijini Yokohama, Japan. Uzinduzi huo ullihudhuriwa na wadau mbalimbali kutoka sekta za umma na binafsi za nchini
Japan ambao pia, walionesha huduma mbalimbali wanazozitoa katika nchi za Afrika. 

Katika tukio hilo, Mhe. Naibu Waziri Chumi akiambatana na Balozi wa Tanzania nchini Japan Mhe. Baraka Luvanda walipata nafasi ya kusalimiana na wadau wa taasisi na kampuni za Japan zenye ubia na Tanzania.

TANZANIA YAZISIHI NCHI ZA AFRIKA KUSHIRIKIANA KUTATUA CHANGAMOTO ZINAZOZIKABILI NCHI ZAO

 

Naibu Waziri Mambo ya Nje na Ushirikiano wa Afrika Mashariki Mhe. Cosato Chumi akichangia mada ya Amani na Utulivu: kuhakikisha Heshima ya Binadamu na Usalama wa Binadamu kwenye sehemu ya pili ya Mkutano wa Kimataifa wa Tokyo kuhusu Maendeleo ya Afrika ngazi ya Mawaziri unaofanyika jijini Tokyo, Japan kuanzia tarehe 24-25 Agosti 2024.

 

Waziri Mambo ya Nje wa Japan Mhe. Yoko Kamikawa akifungua  Mkutano wa Kimataifa wa Tokyo kuhusu Maendeleo ya Afrika ngazi ya Mawaziri unaofanyika jijini Tokyo, Japan kuanzia tarehe 24-25 Agosti 2024.

 

Balozi wa Tanzania nchini Japan Mhe. Baraka Luvanda akifatilia ufunguzi wa  Mkutano wa Kimataifa wa Tokyo kuhusu Maendeleo ya Afrika ngazi ya Mawaziri unaofanyika jijini Tokyo, Japan kuanzia tarehe 24-25 Agosti 2024.

 

Baadhi ya washiriki wa Mkutano wa Tisa wa TICAD 2024 wakifuatilia mkutano huo

 

Baadhi ya washiriki wa Mkutano wa Tisa wa TICAD 2024 wakifuatilia mkutano huo

  

 

Washiriki wa Mkutano wa Tisa wa TICAD 2024 katika picha ya pamoja baada ya ufunguzi wa Mkutano huo

  

 

Jamhuri ya Muungano wa Tanzania imetoa wito kwa nchi za Afrika kushirikiana kutafuta suluhisho la kudumu la matatizo na changamoto mbalimbali zinazozikabili nchi hizo. Pia imemewahimiza wadau wote wa maendeleo kutoka nchini Japan kuendelea  kufanya biashara na kuwekeza zaidi barani Afrika ili kuchangia kwa kiasi kikubwa katika maendeleo ya binadamu katika bara hilo ikiwa ni katika juhudi za kuendeleza amani na utulivu kikanda na kimataifa.

 

Kauli hiyo imetolewa na Naibu Waziri Mambo ya Nje na Ushirikiano wa Afrika Mashariki Mhe. Cosato Chumi alipochangia mada ya Amani na Utulivu: kuhakikisha Heshima ya Binadamu na Usalama wa Binadamu kwenye sehemu ya pili ya Mkutano wa Kimataifa wa Tokyo kuhusu Maendeleo ya Afrika ngazi ya Mawaziri unaofanyika nchini Japan tarehe 24-25 Agosti 2024.

 

Ameipongeza Japan kwa kuwa mstari wa mbele kushiriki katika jitihada za kimataifa na kuwaomba washirika wengine wa kimataifa kuiga mfano huo na kuongeza kuwa Tanzania inatambua umuhimu wa ushiriki sawa na ujumuishaji wa wanawake na wanaume, wasichana na wavulana katika kuhakikisha amani na usalama vinatamalaki.

 

Amesema kutokana na umuhimu huo Tanzania iko katika hatua za mwisho za kuandaa na kutekeleza Mpango wa Kitaifa wa Utekelezaji (NAP) kuhusu Wanawake, Amani na Usalama ikiwa ni utekelezaji wa Azimio Na. 1325 la Baraza la Usalama la Umoja wa Mataifa la mwaka 2000. 

 

Amesema siku zote Tanzania imekuwa na mchango muhimu katika  harakati za upatanishi, mazungumzo ya amani na njia nyingine za kidiplomasia katika kuhakikisha amani na utulivu vinadumishwa ndani na nje ya mipaka yake na ndio maana imefanikiwa kuondoa mizizi ya vita vya kikabila na migogoro kwa kuunganisha makabila takriban 126 na kutumia lugha moja ya Kiswahili kama lugha ya Taifa.

 

Ameongeza kuwa kutokana na hali hiyo Tanzania imeendelea na utamaduni wa kuwapatia hifadhi mamia ya wakimbizi na wanaotafuta hifadhi kutoka nchi jirani na zaidi na kwa sasa Tanzania inahifadhi wakimbizi na watu wanaotafuta hifadhi wapatao 237,997 huku wengi wao wakiwa ni wanawake na watoto.

 

Mkutano huo ulifunguliwa na Waziri wa Mambo ya Nje wa Japan Mhe.Yoko Kamikawa umehudhuriwa na Mawaziri, washirika wa TICAD, wawakilishi na waandaaji wenza -Shirika la Umoja wa Mataifa la Maendeleo (UNDP), Benki ya Dunia, Kamisheni ya Umoja wa Afrika na mashirika ya Kimataifa na kikanda, sekta binafsi na  Kiraia kutoka Japan na Afrika.

 

 

 

 

 

 

 

 

NAIBU WAZIRI CHUMI AKUTANA NA NAIBU WAZIRI WA MAMBO YA NJE WA JAPAN

Naibu Waziri Mambo ya Nje na Ushirikiano wa Afrika Mashariki Mhe. Cosato Chumi akisalimiana na Naibu Waziri wa Mambo ya Nje wa Japan Mhe. Kyoto Tsuji alipofika ofisini kwake jijini Tokyo kwa ajili ya kushiriki Mkutano wa Tisa wa ngazi ya Mawaziri wa Kimataifa wa Tokyo kuhusu Maendeleo ya Afrika utakaofanyika nchini huko tarehe 24-25 Agosti, 2024

Naibu Waziri Mambo ya Nje na Ushirikiano wa Afrika Mashariki Mhe. Cosato Chumi akimsikiliza Naibu Waziri wa Mambo ya Nje wa Japan Mhe. Kyoto Tsuji alipomtembelea ofisini kwake jijini Tokyo kwa ajili ya kushiriki Mkutano wa Tisa wa ngazi ya Mawaziri wa Kimataifa wa Tokyo kuhusu Maendeleo ya Afrika utakaofanyika nchini huko tarehe 24-25 Agosti, 2024

Naibu Waziri wa Mambo ya Nje na Ushirikiano wa Afrika Mashariki Mhe. Cosato Chumi akizungumza alipomtembelea Naibu Waziri wa Mambo ya Nje wa Japan Mhe. Kyoto Tsuji ofisini kwake jijini Tokyo. Wa kwanza kushoto ni Balozi wa Tanzania nchini Japan Mhe. Baraka Luvanda akifuatilia mazungumzo hayo

Mazungumzo yakiendelea

Naibu Waziri wa Mambo ya Nje na Ushirikiano wa Afrika Mashariki Mhe. Cosato Chumi (Mb) amekutana na kuzungumza na Naibu Waziri wa Mambo ya Nje wa Japan Mhe. Kyoto Tsuji ofisini kwake jijini Tokyo.

Viongozi hao wamekubaliana kuendelea kushirikiana ili kuimarisha uhusiano na ushirikiano uliopo kati ya Tanzania na Japan kwa manufaa ya pande mbili.

 
Akizungumza katika kikao hicho Mhe. Chumi aliishukuru Serikali ya Japan kwa kuendelea kuchangia maendeleo ya Tanzania katika sekta mbalimbali ikiwemo miundombinu, uwekezaji, elimu, na afya.

Amesema Tanzania imejipanga kuhakikisha inaongeza kiwango cha biashara na uwekezaji kati yake na Japan na hivyo kuchochea ukuaji wa maendeleo ya kiuchumi na kijamii kwa manufaa ya pande zote mbili.

Naye, Mhe. Tsuji ameelezea utayari wa Japan kuendelea kushirikiana na Tanzania na kuimarisha uhusiano uliopo kwa manufaa ya nchi hizo.

Amesema Japan itaendelea kushirikiana na Tanzania na kuongeza biashara na bara la Afrika ili kuhakikisha maendeleo ya kweli yanapatikana.

Mhe. Chumia yuko nchini Japan kuhudhuria Mkutano wa Tisa wa Kimataifa wa Tokyo kuhusu Maendeleo ya Afrika (TICAD) ngazi ya Mawaziri utakaofanyika jijini Tokyo tarehe 24-25 Agosti 2024.

 

TANZANIA KUSHIRIKI MKUTANO WA KIMATAIFA WA TOKYO KUHUSU MAENDELEO YA AFRIKA

 

BALOZI KOMBO AKIPONGEZA KITUO CHA DKT SALIM AHMED SALIM KWA KUTOA MAFUNZO YA STADI ZA UONGOZI NA MAJADILIANO

Waziri wa Mambo ya Nje na Ushirikiano wa Afrika Mashariki, Mhe. Balozi Mahmoud Thabit Kombo (Mb.) amekipongeza Kituo cha Uhusiano wa Kimataifa cha Dkt. Salim Ahmed Salim (CFR) kwa kutoa mafunzo yenye lengo la kuwanoa vijana katika masuala ya uongozi hususan kwenye stadi za Uongozi na Majadiliano. 

 

Mhe. Balozi Kombo ametoa pongezi hizo leo Agosti 22, 2025 alipokitembelea Kituo hicho ambacho ni moja ya Taasisi zilizo chini ya Wizara kwa lengo la kujitambulisha, kufahamu majukumu yake pamoja na kuangalia maendeleo ya mradi wa jengo la vyumba vya mihadhara.

Akizungumza na wanafunzi kutoka Taasisi za Umma na Sekta binafsi wanaoshiriki mafunzo ya muda mfupi kuhusu stadi za Uongozi na Majadiliano chuoni hapo, Mhe. Waziri Kombo amewataka kuzingatia mafunzo hayo ambayo yatawajenga katika masuala ya uongozi, uzalendo na majadiliano, fani ambazo ni muhimu katika ulimwengu wa sasa wa kutumia diplomasia na uhusiano na mataifa mbalimbali kunufaika kiuchumi.

Amesema washiriki hao wana bahati kubwa kupatiwa mafunzo katika Kituo cha Uhusiano wa Kimataifa cha Dkt. Salim Ahmed Salim ambacho pia baadhi ya wakufunzi wake ni Mabalozi na Wanadiplomasia wabobevu  kwenye masuala ya uhusiano wa kimataifa na Diplomasia kwa ujumla.

“Kwenu ninyi washiriki wa mafunzo haya mna bahati kubwa ya kufundishwa na wanadiplomasia nguli akiwemo Balozi Modest Mero ambaye ni miongoni mwa wanadiplomasia waliowahi kuhudumu kwa nafasi ya kuiwakilisha nchi yetu katika Umoja wa Mataifa nchini Marekani. Hivyo, Balozi Mero kwa wasifu wake ni fursa kubwa kwenu washiriki kupokea elimu ya masuala ya stadi za uongozi na majadiliano”, amesema Mhe. Kombo.

Wakati wa ziara hii Mhe.Kombo amekutana na kufanya mazungumzo na Mwenyekiti wa Baraza la Uongozi wa Kituo hicho, Mhe. Balozi Ramadhan Muombwa Mwinyi, Kaimu Mkurugenzi wa Kituo hicho, Dkt. Felix Wandwe ndc, baadhi ya Wajumbe wa Menejimenti ya Kituo hicho na Viongozi kutoka Wizara ya Mambo ya Nje na Uhusiano wa Afrika Mashariki.

 

WAZIRI KOMBO AAGANA NA BALOZI WA UFARANSA NA USWIS HAPA NCHINI.

Waziri wa Mambo ya Nje ma Ushirikiano wa Afrika Mashariki, Mhe. Balozi Mahmoud Thabit Kombo (Mb.) ameagana na aliyekuwa Balozi wa Ufaransa Mhe. Nabil Hajlaoui na Balozi wa Uswisi Mhe. Didier Chassot ambao wamemaliza muda wao wa uwakilishi hapa nchini.

Katika mazungumzo yao yaliyofanyika kwa nyakati tofauti katika Ofisi ndogo za Wizara jijini Dar es Salaam Mhe. Balozi Kombo amempongeza Mhe. Nabil Hajlaoui kwa kazi kubwa na nzuri aliyoifanya katika kipindi chake cha uwakilishi hapa nchini.

“Mhe. Balozi Hajlaoui nakupongeza sana kwa kazi kubwa, nzuri na ya mfano, uliyoifanya hapa nchini, hasa katika eneo la kukuza na kuimarisha uhusiano wa kidiplomasia na ushirikiano kati ya Tanzania na Ufaransa, kwakweli hongera sana na nikutakile kila la heri huko uendako,” alisema Balozi.

Naye Mhe. Balozi Hajlaoui ameshukuru kwa ushirikiano alioupata wakati wote alipokuwa nchini na hivyo kumuwezesha kutekeleza majukumu yake kwa tija na ufanisi bila ya kikwazo chochote na kuahidi kuwa atakuwa balozi mzuri wa Tanzania huko aendako.

Katika tukio lingine akiagana na Balozi wa Uswisi anayemaliza muda wake nchini Mhe. Didier Chassot Balozi Kombo amemshukuru na kumpongeza kwa kushiriki kikamilifu katika kuimarisha ushirikiano kati ya Tanzania na Uswisi katika kipindi chake cha uwakilishi.

Amemuahidi kuwa Serikali kupitia Wizara ya Mambo ya Nje na Ushirikiano wa Afrika Mashariki itaendelea kutoa ushirikiano kwa ajaye na kuendelea na kukamilisha masuala mbalimbali ya ushirikiano aliyoyaanzisha.

Naye Mhe. Chassot ameishukuru Wizara kwa ushirikiano mzuri iliyompatia wakati wote wa uwakilishi wake hapa nchini na kuahidi kuwa atayaendelea mazuri yote alyojifunza alipokuwepo hapa nchini.

 

WAZIRI KOMBO APOKEA MWALIKO WA RAIS SAMIA KUSHIRIKI JUKWAA LA FOCAC

Waziri wa Mambo ya Nje na Ushirikiano wa Afrika Mashariki Mhe. Balozi Mahmoud Thabit Kombo amepokea mwaliko rasmi wa Rais wa Jamhuri ya Muungano wa Tanzania Mhe. Dkt. Samia Suluhu Hassan, kushiriki Mkutano wa Kileke wa Wakuu wa Nchi na Serikali wa Jukwaa la Ushirikiano kati ya China na Afrika (FOCAC) kutoka kwa Rais wa Jamhuri ya Watu wa China Mhe. Xi Jinping utakaofanyika mwezi Septemba 2024 jijini Beijing nchini China. 

Mwaliko huo umewasilishwa na Balozi wa Jamhuri ya Watu China nchini Tanzania Mhe. Chen Mingjian katika Ofisi ndogo za Wizara jijini Dar es Salaam, pia umeainisha  nafasi ya kipekee kwa Mhe. Dkt. Samia Suluhu Hassan kuzungumza katika kikao cha ufunguzi kwa niaba ya nchi za Ukanda wa Afrika Mashariki pamoja na kuzungumza Katika Mkutano wa Ngazi ya Juu utakaojadili mada ya Maendeleo ya Viwanda na Kilimo cha Kisasa.

Akipokea mwaliko huo kwa niaba ya Mhe. Rais, Mhe. Balozi Kombo ameelezea kuwa nafasi ya Mhe. Rais kushiriki na kuzungumza katika Jukwaa hilo itaipa nchi fursa ya kuangazia uhusiano na ushirikiano uliopo kati ya Tanzania na China na Jumuiya ya Afrika Mashariki kwa ujumla,  hali ambayo itasaidia vipaumbele vya maendeleo vya Tanzania na Jumuiya ya Afrika Mashariki ambapo Tanzania ni kinara na kiongozi wa kupigiwa mfano kwenye Jumuiya hiyo kongwe Afrika.

Aidha Balozi Kombo amemhakikishia Balozi Chen ushiriki wa Tanzania katika Mkutano wa Kileke wa Wakuu wa Nchi na Serikali wa FOCAC ambapo Tamko la FOCAC na Mpango Kazi wa FOCAC itakuwa ni moja ya Matokeo ya Mkutano huo. 

Naye Balozi wa China Mhe. Chen ameelezea kufurahishwa kwa China kutokana na kupokelewa kwa mwaliko wa kuhudhuria Mkutano na kuongeza kuwa kitendo hicho kinaendelea kukuza na kuimarisha uhusiano wa kidiplomasia na wa kihistoria uliopo kati ya Tanzania na China.

Amesema China inaona Tanzania kama mshirika muhimu wa maendeleo kwa nchi za Afrika Mashariki na Afrika kwa ujumla na kuahidi kuwa China itaendelea kushirikiana na Tanzania. 

Jukwaa la Focac lilianzishwa kwa lengo la kukuza ushirikiano kati ya China na Afrika ili kuchagiza maendeleo kupitia sekta mbalimbali za kijamii na kiuchumi. 

FOCAC limekuwa jukwaa linalotoa fursa sawa kwa pande zote mbili kujadili masuala muhimu ya kimaendeleo na kutafuta majibu ya changamoto mbalimbali zinazoikabili dunia ikiwemo amani na usalama na mabadiliko ya tabia nchi.